Minister Rocco Tjon, titular di Husticia y Asunto Social:
*Seguridad, infrastructura, higiene ta wordo controla
ORANJESTAD (AAN) – Minister Rocco Tjon, titular di Husticia y Asunto Social, den entrevista cu DIARIO a expresa cu ta importante di bisa cu gobierno no ta stipula prijs di un speelschool. Esaki ta na e doño, cu sa kico ta su gastonan y sa kico ta e prijs cu e personanan cu ta yud’e atende e crèche ta pidie. Pero, el a enfatiza hopi, e seguridad di e muchanan mester ta na prome lugar.
E mandatario a agrega cu ta hopi importante pa bolbe splica cu tin cosnan cu ta bay sosode den fase, y esey el a splica den Parlamento dia cu a trata e ley, y algo cu e mes a comunica na tur e diferente leisternan na momento cu a duna anochinan di informacion.
“Tin persona cu, por ehemplo, tin cu percura pa un cushina y di e forma ey tene cuenta cu tur aspecto di seguridad, algun crèche mester tene cuenta cu e parti di electricidad cu kizas no ta cumpli mas, no ta safe, y tin cu tin cu cumpli cu otro aspectonan di seguridad. Higiene tambe ta hopi importante, y mi ta kere cu na final di dia, y mi ta kere tambe cu tur e leidsternan ta di mesun opinion cu nos, cu seguridad di e muchanan ta na prome lugar. Ta hopi importante pa nos traha pa evita casonan lamentable cu a yega di sosode den pasado pa no sosode den futuro”, Minister Rocco Tjon a remarca.
E dignatario a señala cu tabata tin hopi rapport cu a wordo skirbi tocante problema di seguridad, cu ta data di mas cu diez aña atras, unda a señala falta di seguridad den speelchool, y pesey ta hopi importante pa regula esakinan. Y p’esey den e proceso di regula e materia aki te tene cuenta cu diferente aspecto, y gobierno ta yuda speelscholnan pa nan cumpli cu e ley den fase pa esnan cu tin mas gasto, no tin nodi haci inversion di inmediato.
“Pero obviamente, ora nos ta wak e parti di seguridad, tin diferente tipo di infraccion. E infraccion cu ta exigi un medida inmediato e mester wordo cumpli cu ne mesora, pasobra seguridad di muchanan ta na prome lugar. Di e forma aki nos ta atende cu e topico aki”, e dignatario a reitera.
