Tur tipo di pakete pa tickets pa mira Festival
- Edwina Werleman a indica cu hopi banda lo ta participando
ORANJESTAD (AAN): Carnaval 71 a yega, pero di algun tempo caba Stichting MUSICA a bin ta haciendo preparacion pa e gran Festival di Aruba Caiso & Soca Monarch 2025.
Edwina Werleman di MUSICA, a bisa cu nan ta 100% trahando riba e Festival pa trece den ambiente y ‘vibe’ positivo, grandi, y exitoso pa e aña aki.
E bandanan stima na Aruba lo ta riba escenario un biaha mas, acompañando musiconan talentoso cu ta lanza e composicionnan completamente nobo.
Despues cu inscripcion di e participantenan cera, ta preparando un actividad di ‘Meet the Press’ unda por conoce tur participante. Lo tin extra celebracion e anochi ey cu prensa, ora cu ta bay trek lot pa haya sa ki number e cantantenan lo ricibi. Esaki lo socede Diahuebs anochi na TRYP by Wyndham, cu ta e hotel cu antes ta conoci como Brickel Bay.
Posteriormente lo cuminza prepara pa e Prefinalnan di Caiso y Soca, cu lo ta riba 14, 15, y 16 di Januari 2025 na Centro di Bario Brazil. E lugar aki ta unda cu e actividad aki a nace, y cu a cosecha hopi exito den pasado. Segun Edwina Werleman, pesey hunto cu musiconan ta regresa eynan pa 2025.
Awor na 2025, e temporada di Carnaval ta dura mas hopi cu aña anterior. Y e hecho cu ya caba dianan 14 en adelante ta cuminza lanza cancionnan nobo, ta un garantia cu e cancionnan lo bay bira hit den e siguiente luna pa asina pa Parada Grandi dia 2 di Maart, nan lo ta resonando fuertemente y publico ta costumbra cune.
E anochi final di Festival di Aruba Caiso & Soca Monarch mes lo ta Diasabra 8 di Februari 2025, y esaki lo ta den Aruba Carnival & Entertainment Village na San Nicolas. Aki lo bin haya sa si acaso ta King of Queen ta conkista e titulonan di e anochi ey.
Interes ta grandi: Segun Edwina Werleman di MUSICA, e tin informacion cu e interes di cantantenan pa participa ta hopi grandi pa e Festival di 2025. E ta contento di e reaccion cu ta drenta, y a compronde cu ya tin 33+ cancion caba inscribi, y ta conta cu 13+ di grupo musical cu a inscribi, y ainda falta.
“Mi ta sigur cu tin como 3 pa 4 banda cu ainda ta bay inscribi,” Werleman a indica. “Pues nos ta super happy cu e participacion pa nos Aruba Caiso & Soca Monarch 2025.”
Ademas di e caranan di semper cu ta riba escenario pa ofrece nan mihor prestacion y bos pa nan cancion, Werleman a indica cu lo bay tin tambe algun cara nobo cu ta participando pa prome biaha, y na su opinion esey ta algo super hopi bunita.
Den pasado tabatin un elenco di ‘rookies’ cu a crece, y pa 2025 ta mirando cu e hobennan aki kier bini, pasobra nan kier mustra e veteranonan cu nan a crece y ta cla pa competencia.
Cumpra carchi online: Edwina Werleman a indica cu e fin di siman aki mes lo bay cuminza anuncia bendemento di carchinan completamente re-diseña y atractivo na diferente outlet rond di e isla, pero tambe lo bo por bay cumpra esaki online usando e App y plataforma di Pay.aw
E bon noticia ta cu nan lo ta ofreciendo pakete atractivo pa esnan cu kier bay mira tur Pre-Finals na Centro di Bario Brazil, y e Final na Aruba Carnival & Entertainment Village. Tambe lo tin package pa studiante, package pa companiannan, y tambe ticket individual pa cada fecha.
Stichting MUSICA lo bay tin algun promocion riba nan website tambe di stichtingmusica.org
Werleman a agrega, cu ta ricibiendo gran sosten di e compania Setar NV, y esaki ta encera cu atrobe lo bay tin ofrecimento di Pay-per-View pa mira e Festival di Aruba Caiso & Soca Monarch 2025.
