Randall van Trigt:
ORANJESTAD (AAN): Señor Randall van Trigt di Stichting Hunto den entrevista cu DIARIO a remarca cu den conexion cu conscientisacion di salud mental, adiccion y e efectonan relaciona na otro, e aña aki Stichting Hunto ta organisa eventonan riba e tema di bullying. Aña pasa a trata e tema di suicidio y tawata un evento exitoso.
Señor van Trigt a remarca cu e temanan aki, ta temanan cu Stichting Hunto ta wak den nan mesun data kico ta resona cu salud mental y adiccion. “E aña aki nos a ripara cu pa hopi hoben, e tema di bullying ta conduci na salud mental y abuso di sustancia”, señor van Trigt a menciona.
E aña aki Stichting Hunto a expande nan programa. Durante 5 dia nan a invita mas di 500 mucha di diferente scol, na unda cu señor Levi Silvanie di Hulanda, riba un manera di musica, a trata e tema di bulliying. E meta tabata pa yuda adresa e problematica aki. E evento aki a cuminsa dia 3 di November y ta caba awe dia 7 di November.
E di dos evento lo ta un panel discussion riba e tema di bullying pa publico en general pero specialmente pa mayornan. E evento aki tambe ta hunto cu señor Levi Silvanie pero lo bay mas profundo y lo tuma luga mañan dia 8 di November.
E di tres evento, cu lo ta e clausura tambe, lo ta un forum pa e veld di enseñsa unda cu lo discuti bullying na scol, no solamente di mucha cu mucho sino, di mucha pa juffrouw, juffrouw pa juffrouw y juffrouw pa mucha. Y tambe pa doñonan di trabou. Den e forum aki, señor Johny Boekhoudt, psicologo di mucha, lo ta e orador principal. Tambe lo tin un panel discussion pa debati riba e tema di bullying. E forum lo tuma luga dia 11 di November.
