Rose-Ann de Cuba y Zulianne Faro:
ORANJESTAD (ANN)— Diahuebs, Stichting Hunto a yama un conferencia di prensa den cual Rose-Ann de Cuba, organizador di evento, a hiba palabra y a comparti e grato noticia cu pueblo di Aruba, cu nan tin un song festival cu lo tuma lugar dia 6 di November venidero.
E song festival lo tuma lugar na Centro di Bario Brasil, y e tin como meta pa e clientenan haya oportunidad di mustra un tiki di nan talentonan, pasobra hopi biaha nan ta tuma caminda robes, pero awo nan ta bay subi stage y mustra cu nan tin talento, cu nan por tin oportunidad di nobo, y cu nan por canta, liber di substancia.
Hunto cu Rose-Ann tabata Bianca Brown, directora di Centro Colorado, Zulianne Faro, tesorera; y Arthur Comenencia Hefe di Afdeling.
Seguidamente, Zulianne Faro a menciona cu esaki ta bay ta un anochi grandi pa e clientenan y pa esnan cu ta bay participa, y esnan presente pa duna nan clientenan animo. Zulianne a invita pueblo di Aruba pa participa den e evento compañando e Stichting Hunto. E anochi aki lo bay tin un cushina bon surti, diferente tipo di cuminda y snacks y un bar sin alcohol.
E hoben a pone enfasis riba pakico un bar sin alcohol, pasobra ainda nan tin cliente cu ta participando den e programa y tambe lo bin clientenan cu ta clean y cu kier participa. Y e invitacion ta bay pa comunidad pa bin presencia e evento aki liber di alcohol, apoya e Stichting y brinda e clientenan sosten.
