Diantha Nuesch, Relacionista Publico BOB:
ORANJESTAD (AAN) — Diantha Nuesch, Relacionista Publico di Fundacion BOB, den entrevista cu DIARIO a comenta, cu e contesta di e personanan cu ta wordo invita pa bin pasa e mammogram, cada dia ta mihor.
Manera el a indica den un prome entrevista, nan ta invita damanan sano den edad entre 45 cu 75 aña pa pasa e test, ya cu esaki ta un manera pa detecta cualkier indicio na tempo. Den medionan social tambe por wak cu hopi mas hende ta envolvi, compara cu añanan anterior, ya cu hopi hende ta durf di comparti nan testimonio y esaki tambe ta yuda motiva y concientiza personanan, pa nan participa y BOB ta ripara cu mas hende ta bin nan cita, of tuma iniciativa pa yama y traha nan cita, y tur esaki ta cosnan positivo, cu ta haci e fundacion sinti orguyoso y wak cu e pueblo di Aruba, ta mas conciente.
“Pero ainda falta mas. Nos mester sigui motiva otro y concientiza tur e hendenan muher, no so esnan di 45 bay ariba, pa nan participa pero tambe esnan mas hoben pa nan sa cu salud di pecho ta hopi importante for di un edad jong, pa nan siña conoce nan pecho, practica examinacion propio cada luna, pa nan sa ki caminda tin pa cana ora nan ripara diferencia den e pecho, y tur esaki ta concientizacion di e importancia di chekeonan di pecho cu BOB ta duna na tur edad. Y tambe pa nan recorda nan mama, nan tanta, nan ruman, un colega, motiva otro pa nan por participa tambe, pa no perde nan chens y haci nan cita. Cada dos aña bo tin derecho pa participa. Cu su AZV card e persona ta traha un cita, y den menos cu diez minuut e ta inscribi.
PA E DI DIEZ ANIVERSARIO:
Pa e diez Aniversario di BOB, Diantha Nuesch a menciona cu nan kier continua cu nan programa di screening, pa e generacion futuro di nos hendenan muher, y duna hopi mas concientizacion.
El a duna di conoce cu pa prome biaha den historia nan tin un 'samenwerkingsproject' WKF, Mary Joan Foundation y Fundacion Cancer di Prostate, cu ta un serie di “pot cast” pa un aña largo, pues di October 2022 te October 2023, unda tur luna, tur siman, un di e fundacionnan tin un “pot cast” tocante diferente tipo di cancer, e efectonan cu esaki tin riba bo gremio social, bo mes persona, bo salud mental, con pa preveni, testnan y lo tin diferente specialista. Pues, nan ta uni den prevencion!
“Esaki ta un proyecto sumamente bunita, y segun mi ta prome biaha na Aruba cu nos tin algo asina. Y nos kier sigui traha riba dje, colabora cu mas fundacion, pasobra ‘uni nos por combati’!” Asina Diantha Nuesch a remarca.
Stichting BOB kier a gradici pueblo di Aruba en general, y prensa cu semper ta asisti nan cu informacion, pa yega e hendenan, e Bestuur Leiden, e stakeholders y organizacionnan cu BOB ta colabora y traha cu nan, nan team interno cu tur dia ta dedica nan mes cu hopi amor y atencion pa nos hendenan muher.
