ORANJESTAD (AAN): Diantha Nuesch, kende ta relacionista publico y mercadeo pa Stichting BOB Aruba,
el a indica cu Stichting BOB nan 'target group' ta hende muher y ta ripara for di nan mes cu tin preocupacion pa cu e pareha tambe den cas. E meta ta pa tin union tur caminda y colaboracion. Si por traha hunto por duna informacion na hende muher y na hende homber tambe den un combinacion di charla.
El a agrega cu esaki a trece cu ne un reto ya cu hende homber ta completamente otro cu hende muher. Pero e ta trece su beneficionan tambe. Hopi biaha hende muher ta trece informacion y hib'e cas. Toch, hende homber ta haya di e manera ey informacion cu ta importante pa su salud propio.
Nuesch a sigui bisa cu cancer ta un malesa cu por evit'e. Por detect'e na tempo, pero pa evita ta fastioso pasobra tin diferente factor cu por conduci na un malesa cronico of na un cancer.
Pesey si haya hende homber y hende muher hunto den un sala di charla y si por colabora cu mas instancia cu por duna mas informacion riba con pa tin un estilo di bida mas saludabel esaki lo ta beneficioso pa henter pueblo di Aruba, a remarca.
BOB awor ta bay enfoca pa yega na hende homber via e hende muhernan pasobra nan ta esnan cu ta hunga un rol den hopi caso grandi pa lanta e hubentud y pa di e manera ey caba por educa e yiu hombernan tocante salud en general, cancer di prostaat y cancer di pecho, pero tambe riba e importancia di haci e chekeonan na tempo.
Hende homber mester ta habri pa ricibi informacion, sa cu nan no ta nan so. Mester tin confiansa den dokter di cas, den bo pareha y sa cu famia semper tey pa otro.
Tin hopi testimonio di hende muhernan cu ta splica con nan pareha ta yuda nan den e procesonan dificil. Ta importante pa nos sconde e malesa. Deteccion na tempo ta hopi importante y ta haci un diferencia masha grandi mes den e bida cu ta sigui, Diantha Nuesch a subraya.
Pa loke ta 2024, a bisa cu tin mas plannan pa continua, tin mas colaboracionnan, mas charla. E charlanan cu ta duna ta completamente gratis. Kier duna mas informacion no solamente tocante cancer di pecho pa hende muher, pero un plataforma medico mas grandi pa ofrece e hendenan aki e hermentnan riba kico por haci na cas, cu kico nan tin cu tene cuenta cu ne pa asina tin un estilo di bida mas saludabel, Nuesch a duna di conoce.
