Dia 29 di October a ahusta acta notarial
ORANJESTAD (AAN): Den loke ta un paso significativo pa salud di comunidad, Stichting BOB Aruba a anuncia oficialmente su cambio di nomber pa "Fundacion ABO," cu e mision expandi pa inclui varios tipo di screening pa cancer na Aruba.
E cambio ta formalisa cu e firmamento di un ahustacion na e acta notarial, un paso cu ta representa e compromiso continuo di e fundacion den su lucha contra cancer na e isla. Esaki a tuma lugar dia 29 di October ultimo.
Fundacion ABO ta dedica pa amplia su esfuerzo na aña 2025 pa cuminsa trece nos comunidad mas cera na tres programa importante pa deteccion temprana di cancer:
- BOB: E programa cu ta enfoca riba screening pa cancer di pecho, un programa ya conoci y implementa den Aruba, cu lo continua asisti den deteccion tempran pa salud di e hende muher.
- BOCA: Un programa nobo cu lo enfoca riba screening pa cancer di boca di matriz, pa asisti den prevencion y deteccion tempran di cancer cervical.
- CORESA: Tambe un programa nobo, dedica pa screening pa cancer di tripa, un area di deteccion cu ta agrega un dimension nobo na e esfuerso pa combati cancer na Aruba.
Cu e expansion di su mision y e implementacion di e dos programa nobo, Fundacion ABO ta spera ofrece mas posibilidad na comunidad pa haci uzo di screening tempran y proteha salud.
