ORANJESTAD (AAN) — Na momento cu na 1983 Betico Croes como lider di e delegacion di Aruba a yega na un acuerdo cu Hulanda,
Aruba a bay di acuerdo cu Prome di Januari 1986, Aruba ta completamente liber pa carga su responsabilidad nacional den Reino.
Esaki ta e unico realidad cu cual Aruba mester atende cu Reino den realisacion di e acuerdo cu Aruba a alcansa cu Reino na 2020 pa por logra su recuperacion autonomo, economico, financiero y social den futuro.
For di momento cu Prome Ministro Wever-Croes a mustra Hulanda riba e status autonomo den Reino y a haya trato di pais autonomo den Reino, Aruba no por atende cu Hulanda a base di ningun palabracion cu ningun otro pais autonomo den Reino.
E negociacionnan entre Reino y paisnan Hulandes den Caribe ta hiba tur pais den Reino na e base di Statuut cu a cambia entrante Prome di Januari 1986, na momento cu Aruba a haya responsabilidad pa su propio asuntonan a base di loke ta beneficia Aruba y e Arubianonan.
Na momento cu negociacionnan den Reino a cuminsa pa asistencia Hulandes na paisnan Hulandes den Caribe, cada pais a sigui nan propio rumbo mescos cu cada pais ta haci den nan maneho diario autonomo.
Te awe Prome Ministro Wever-Croes a atende na forma corecto y di acuerdo cu loke ley ta exigi. Prome Ministro Wever-Croes a haya aprobacion di Parlamento di Aruba, manera Ley ta exigi, y tambe a atende cu e gremionan di Aruba y a tene Pueblo ampliamente informa di cada paso cu el a tuma.
Gobierno di Aruba no tabata tin participacion den loke otro paisnan Hulandes den Caribe a dicidi, loke tampoco por den cuadro di e autonomia cu Aruba a logra for di 1986.
Awe e anhelo grandi cu e pone Aruba lucha pa su Status Aparte, cu tabata marca pa sacrificio y lucha, no por wordo entrega pa Aruba por yega na un acuerdo cu otro paisnan Hulandes den Caribe cu tin nan propio problemanan, nan propio maneho, nan propio realidadnan.
Aruba awe mester defende e Florin Arubano, simbolo di su autonomia financiero den tur aspecto. Aruba mester defende loke ta na fabor y bienestar di e Arubiano y Aruba y lidernan di tur otro paisnan Hulandes den Caribe, mester atende nan asuntonan.
Tur hende na Aruba ta conciente, cu politiconan na otro paisnan Hulandes den Reino, ta sigui nan caminda a base di situacionnan na nan pais, loke mester spera di nan tambe.
Cu e informacion di Prome Ministro Wever-Croes siman pasa, cu e no ta bay pone e e asistencia Hulandes a base di e Acuerdo cu Hulanda na peliger, a causa impacto den poblacionnan di otro islanan, ta conoci. Manera DIARIO a splica na fin di siman pasa, na otro paisnan Hulandes den Caribe, e posicion di Prome Ministro Wever-Croes pa mantene e palabracionnan basico cu Hulanda, a cay den hopi bon tera y sigur a haya atencion di politiconan di e paisnan.
Pero esaki ta nan asunto interno y Aruba mester atende cu e problema directamente cu Hulanda, mescos cu Hulanda a cambia su prome posicion pa atende cu Aruba como un pais autonomo cu no ta mara na ningun otro pais pa tuma su decisionnan.
E lucha di Status Aparte di Aruba a culmina na e momento cu Betico Croes na 1983 a yega na un acuerdo cu Reino pa Aruba ta un pais autonomo den Reino.
Ta a base di e realidad legal, Aruba los di otro paisnan Hulandes mester sigui atende cu Hulanda pa yega na recuperacion a base di e Masterplan di Prome Ministro Wever-Croes, cu mester bira e base pa recuperacion di Aruba cu yudansa di Hulanda.
Corectamente pues, Prome Ministro Wever-Croes no por pone un bon relacion cu Hulanda na peliger pa acomoda situacionnan na otro paisnan den Reino cu tin nan propio gobernacion, cu mester dicidi na forma autonomo riba su propio destino, su propio futuro.
For di Prome Januari 1986, tanto pa e relacion entre Aruba y Hulanda como e relacion entre Aruba y e paisnan Hulandes den Caribe, e Statuut ta papia un palabra cla.
“Steunend op eigen kracht doch met de wil elkander bij te staan”. Cada pais ta actua riba nan propio forsa, segun nan propio decisionnan aunke ta yuda otro riba tereno, cu no ta mishi cu responsabilidadnan directo di cada Gobierno di cada pais.
Cada pais den Reino pues, mester dicidi na forma autonomo kico nan ta haci cu nan relacion cu Hulanda.
