WILLEMSTAD – Informe cu ta yega Aruba for di Corsou ta indica cu e cantante Stanley Clementina ta introduci
un ‘road fire’ candela titula ‘Sak Bo Piki’, inspira pa Kompa, Afrobeats y e ritmo surnameño, ‘kawina’ cu ta un di e ritmonan indigena di Surinam.
Aki Stanley ta deriva inspiracion fo'i e dicho ‘alesi e fadon’ cu ta nifica aros ta cai, anto e koro ta contesta ‘saka pik’in’ na sranantongo.
'Sak Bo Piki' ta sigui e hit pehagoso di KOMEHEIN cu a re-introduci na e talento di Stanley Clementina na 2018. Tambe Stanley ta poniendo e toke final na su tumba y ta ensayando cu Excellence, e banda hoben cu semper a companj'e durante Festival di Tumba.
Sak Bo Piki
Stanley ta conoci pa su piesanan unda tiki comico y kisas hasta un poco dobel sinti. Cu ‘Sak Bo Piki’, Stanley ta motiva specialmente e damitanan pa sak i piki e ambiente. Ta prome biaha cu Stanley ta colabora e talentoso musico y areglista Xemio Jacobs, miho conoci como Mr. Magic.
Den ‘Sak Bo Piki’, Stanley a toca e bas africano estilo di Congo, y Xemio a toca tur sobra instrumento. Xemio a compronde mesora kico tabata e vision musical di Stanley y hunto nan a rafina e areglo. Ya e dos titan musical ta trahando riba algun produccion adicional cu nan lo lansa den futuro. Cu ‘Sak Bo Piki’, Stanley ta introduci un baile nobo, unda e cabayero ta tira su lenso abou y e dama ta sak y piki'e.
Festival di Tumba
Actualmente Stanley ta na Corsou pa su di cuater participacion den Festival di Tumba, unda el a opta pa atrobe bay cu e banda Excellence. Despues di inscripcion pa Festival di Tumba 2025 diadomingo ultimo, ya e anticipacion pa Stanley su tumba ta creciendo bou di su fanaticonan. E añanan anterior Stanley a marca pauta cu su interpretacionnan melodico y diferente.
Mas Produccion
Na october 2024, Stanley a compaña cantante Jayh Jawson pa dos presentacion importante durante AFAS LIVE na Hulanda, pa ken e tin algun aña caba ta funciona como su director musical. Tambe Stanley a compaña e duo popular di musica urbano antiyano, Area 51, cu pa prome biaha despues di dies aña tabatin algun presentacion na Boneiro y Corsou. Tambe Stanley tin mas cantica na caminda y ya ta den studio pa enfoca riba su propio produccionnan. Na fin di februari, Stanley ta bay lansa un cantica cu ta bay dal duro cu Jandino Asporaat y Dongo.
