Siman nobo ta habri cu caida prijs di petroleo te 66 Dollar pa baril
*Programa di austeridad awor mester ta base di gobierno nobo
*Companianan di Merca mester cera porta na Venezuela awor
ORANJESTAD AAN) —Un situacion di turbulencia mundial ta haya mas expresion directamente den porta di Aruba, caminda Gobierno di Nicolas Maduro ta en espera di mas sancion di parti di Merca.
Siman pasa a bira conoci cu e Presidente Mericano, Donald Trump, a exigi pa e compania Merican Chevron descontinua su actividad petrolero na Venezuela,
E desaroyonan entre Venezuela y Merca, ta solamente parti di e totalidad di problemanan mundial, cu a resulta den un caida di e prijs mundial di petroleo, cu a habri siman nobo cu 66 Dollar pa baril.
Un situacion cu a bay completamente contra tur proyeccion mundial pa loke ta trata prijs di petroleo, cu mester wordo reemplaza pa motibo climatologico pero na mes momento ta bira e arma di confrontacion grandi na mundo.
Ayera e situacion mundial di conflicto, hasta a duna indicacion cu no mester exclui un situacion di recesion mundial cu lo tin impacto tremendo, cu resultado directo pa Aruba tambe.
Pa Aruba sigur e situacion ta di preocupacion grandi pasobra ta keda demostra cu e cambio di Gobierno lo habri porta pa cambio importante den maneho sigur di placa.
Informantenan clave di DIARIO ta indica cu e desaroyonan actual mester wordo vigila dor di Aruba, caminda no por spera hopi tempo mas pa e resultado di eleccion, wordo refleha directamente den gobernacion.
Manera informantenan ta trece dilanti, e situacion actual ta habri mas caminda pa un situacion indeciso riba cantidad di asunto y proyeccionnan cu comunidad mester por haci den e situacion mundial actual.
Mester tene consideracion cu Reino tambe continuamente ta parti di decisionnan cu mester wordo tuma na Europa, cu escalacion di situacionnan serio.
“Nos ta papia aki di medidanan di seguridad nacional directo cu mester wordo tuma na Aruba cu ta depende riba tur tereno di resto di mundi,”informantenan a trece dilanti.
Manera a wordo splica, Reino Hulandes sigur lo no tolera ningun desviacion di reglanan estricto di bon gobernacion pero tambe di seguridad di e Arubiano y teritorio Arubano.
“Mundo na e momentonan aki ta den suspenso grandi. E caida di prijs di petroleo no ta un motibo pa optimismo pero hustamente di preocupacion pasobra e caida di tarifanan ta mara tambe na decisionnan importante di e Presidente Mericano, Donald Trump y posicionnan nobo cu ta wordo tuma na entre otro Europa,”informantenan ta indica.
Ta hustamente esaki ta exigi un gobernacion estricto di Aruba ya cu na e momentonan aki, Hulanda como parti di Europa, tambe ta pasa den momentonan di tension politico.
Si generalmente caida di prijs di petroleo ta motibo di entusiasmo cerca publico internacional, na e momentonan aki e ta vocifera e tension mundial, pa cual DIARIO a adverti y cu Aruba sigur mester tene na cuenta ya cu Aruba ta depende completamente di exterior.
Na mes momento e portanan cera di Merca pa refugiadonan social na paisnan den vecindario directo di Aruba, ta habri caminda pa mas persona cu kier bandona entre otro Venezuela, busca nan porvenir hasta ilegal, den e region na cual Aruba ta pertenece.
Informantenan ta confirma e suspenso mundial actual cu Aruba como pais cu ta depende di exterior, mester tene na cuenta, sigur pues cu e situacion hopi dificil pa paisnan cu ta forma e union di Europa, cu mester sinta na mesa di dialogo nobo cu Merca, e aliado mas importante di Europa den historia moderno di un mundo, cu ta bandona su seguridad alcansa despues di Segundo Guera Mundial.
