Standard and Poor’s y Fitch Rating ta sostene maneho financiero --- *Rapportnan internacional ta confirma gobernacion responsabel --- *Relacion cu Reino a keda un factor di confiansa internacional
ORANJESTAD(AAN)- Offshore. Uno di e palabranan cu ta ocupa un lugar importante den e vocabulario financiero y economico di Aruba, aunke e no ta salta na bista di Pueblo.
Na momentonan crucial pa economia y bienestar financiero di Aruba como teritorio insular y despues como pais, e relacion cu Aruba tin cu Reino, a haci posibel pa e sector bancario offshore produci pa e pais.
Si Aruba como un isla chikito den un region cu no tabata tin bon reputacion pa maneho financiero debi na e forma cu cantidad di pais bisiña tabata wordo yama “republica di banana”, por a crece, tin su motibonan.
Aruba tabata wordo sostene pa leynan Europeo fuerte cu ta stroba corupcion y menasa pa inversionistanan cu mester hinca nan placa den e pais pa e por desaroya su base economico.
E hecho cu Aruba tabata parti di Hulanda y tabata conoce leynan estricto, a duna Aruba un base solido como centro financiero.
Awe e realidad aki ta bolbe bini dilanti pa uni nan mes na e tremendo trabou cu ta wordo haci dor di Gabinete Evelyn Wever-Croes cu na momento cu el a sinta na 2017 a cambia e maneho cu tabata wordo hiba riba tereno financiero y economico.
Bista di mundo ta fiha riba Aruba pa e forma cu Aruba a atende cu e crisis grandi cu e pais a conoce cu creacion di un situacion di debe nacional, cu a zink Aruba.
Si no tabata pa e hecho cu Aruba por a haya sosten di Reino Hulandes, e situacion di debe nacional, acopla na mas debe di proyectonan PPS, Aruba lo a conoce e situacion di bancarota y lo a conoce situacionnan manera cantidad di pais grandi den e region Latino Americano conoce y cu a mara nan na Rusia, na Cuba of na fiansanan impagabel di Internacional Monetary Fund.
E base cu nos ta trece dilanti aki di e relacion cu y e sosten di Hulanda ta loke Fitch y Standard & Poor a trece dilanti oficialmente na mundo.
E ta nifica cu Aruba ta haya credibilidad den bista di inversionistanan pero tambe den bista di paisnan cu mester haya pago di un forma of otro.
Na momento di e pandemia Standard and Poor a mustra mundo cu Aruba tabata un pais cu no por a wordo cualifica como positivo pa loke ta trata fortalesa financiero.
Pa presenta informacion na mundo, Standard and Poor’s y Fitch ta haci nan investigacionnan local den tur sector y ta copila nan informacion oficial cu companianan internacional cu ta interesa den Aruba por sigui.
E informacionnan oficial di loke por yama conseheronan di hendenan cu kier inverti, hinca nan placa den Aruba ta, cu Gobierno di Aruba ta haci un bon trabou y ta percura pa un situacion financiero na Aruba, caminda placa di inversionistanan no ta na peliger.
Leynan di Aruba ta evita sorpresa inagradabel cu por ocasiona loke por ehempel Venezuela a conoce, ora companianan na Venezuela a wordo nacionalisa dor di Chavez.
Mundo ta haya motibo pa bini Aruba caminda Gobierno Everlyn Wever-Croes a haci un tremendo trabou pa cambia destino financiero di e pais, cu ta conoce un aire fresco bou maneho di Ministro di Asuntonan Financiero, Xiomara Maduro.
Mientras mundo ta “crash” Aruba por sigui traha riba su futuro na man di gobernantenan cu a demostra responsabilidad pa atende cu placa di pueblo!
