Diego de Cuba, presidente:
ORANJESTAD (AAN) – Presidente di Sindicato di Trahadornan di Aruba (STA), den entrevista cu DIARIO, a señala cu ta algo di aplaudi e iniciativa di a lanta un Fundacion pa reconoce e contratistanan; no obstante, manera e ta bisa semper: “bo ta lanta un fundacion cu bon intencion, pero tin hopi scenario cu mester tene cuenta cune, si kier pa e fundacion aki keda bibo, pero tambe mester di control hopi severo”.
El haci e comparacion ora di planta un mata. Ta masha facil pa plant’e, pero pa e keda bibo mester dun’e awa y cultiv’e tur dia.
“Esaki ta locual cu ta bay pasa tambe cu e fundacion aki, cu pa e haya e bida y e rosea necesario, tin hopi cos cu mester wordo cambia den e pais aki cu yama Aruba”, de Cuba a comenta.
E kier a mustra locual a sosode den pasado (aña 1998), door di un rapport cu a wordo traha tempo atras door di mayoria di miembronan di waf. El a bisa cu e rapport aki a mustra e gobierno di e tempo ey, delaster un cos cu tabata sosode den e mundo di construccion, y e companianan cu a compila tur e informacion a traha un informe hopi extenso, cu cifras, calidad di trahadornan, problema cu nan tabata tin, y te ainda e ta mescos.
“Nos di Sindicato STA ta aplaudi e Fundacion aki cu a wordo lanta, e registracion di companianan di construccion, pasobra aworaki si bo no ta cumpli cu tur e rekisitonan cu ta wordo exigi pa gobierno di Aruba y pa locual ta trata e sector di construccion, bo no por bay funciona como compania di construccion. Awo, pa esey sosode, logicamente bo mester di controlnan hopi severo. Y mi ta puntra mi mes: gobierno tin suficiente personal, pa por cumpli cu e controlnan necesario riba tur locual ta sosodiendo den e mundo di construccion? E contesta ta NO. Simplemente no”, de Cuba a remarca.
El a subraya cu na Aruba tin e Inspeccion di Labor, cu un di su tareanan primordial ta controla. E ta bolbe puntra: “Nan tin suficiente hende pa controla? Pasobra den e mundo di construccion un di e problemanan grandi cu Aruba ta sinta cun’e y un di e motibonan ta cu pa mas di 15 aña caba nos ta bringando pa introduci e ley di Arbo. Mi tin entendi cu Minister di Labor kier introduci’e pero den fase. Y mi ta compronde di con e kier haci’e asina ey”, Diego de Cuba a indica. El a bisa cu si nan ta introduci’e abruptamente, lo core e riesgo cu hopi compania lo cay na awa of bati bancarota, of cera nan porta pasobra no por bay cumpli cu ne.
