Kier papia cu Minister tocante pensioen pa empleadonan di Triple-A
ORANJESTAD (AAN) – Presidente di Sindicato STA, Diego de Cuba, a confirma den entrevista cu DIARIO, cu e sindicato a solicita un reunion cu Minister Dangui Oduber, entorno e situacion di Triple- A NV.
E punto cu mas a resalta ta e fondo di pensioen pa e empleadonan di Triple-A NV. Lamentablemente, de Cuba a bisa, cu den Triple-A tin trahadornan nobo cu no conoce e historia di e lucha pa e empleadonan di e compania aki, resorta bao APFA, y tin un persona cu a saca un carta cu ta circula unda ta insinua cu STA no a haci nada cu esey.
Mirando e hecho cu STA ta bringando asina hopi tempo pa e cambio den e fondo di pensioen di Triple-A NV, de Cuba ta bisa cu mester pusha e asunto aki un tiki mas leu, pasobra ora e ta bay bek den historia di e lucha menciona, den principio STA a bin compronde cu tabata tin un situacion cu tabata practicamente impagable pa e compania, pues locual e compania mester a hinca den e fondo di pensioen pa su trahadornan tabata un porcentahe sumamente halto.
Pero despues cu e cambio a bin, STA no ta wak e motibo pakico e compania no ta laga su empleadonan bay resorta bao di APFA, manera tabata nan deseo.
Nan a colecta firma, nan a reuni y na 2011 a reuni cu e minister presidente di e tempo ey, a papia extensamente cune, y a entregue un file grandi cu tur e firmanan. Pero lamentablemente nan a wordo malamente gaña e tempo ey. Eman no a haci nada, y despues STA a manda carta, entre otro pa ex-minister Otmar Oduber, te cu nan a cuminza fada.
Ultimo biaha ta un poco mas cu cuater aña pasa, unda STA a solicita pa bay over na APFA, pero Triple-A, tras di lomba di tur e trahadornan a firma un extension cu otro compania sin consulta cu ningun hende. Nan ta lubida cu e pensioen di cada hende a individual. Anto e ley ta duna bo e espacio cu bo por cambia di identidad di fondo di pensioen cada cinco aña, si esey ta e deseo di e empleadonan.
STA, pa no cana e caminda di Cruz ey, a haci un apelacion na Triple-A NV, pero nan ta haya cu nan ta bayendo riba e mesun caminda. STA ta indica cu esaki no por continua asina, y e peticion cu nan a haci caba na Minister Dangui Oduber mes, despues di a move cielo y tera caba, ta bolbe haci’e.
