ORANJESTAD (AAN) – Den un entrevista cu DIARIO, presidente di e Sindicato di Trahadornan di Aruba (STA), señor Diego de Cuba,
a duna di conoce cu tin un carta cu a sali pa Minister Ursell Arends y pa Gerencia di Serlimar, mirando cu tin un confusion bastante terible, y STA sa cu e ultimo decisionnan tuma door di e minister ta haci dolor, vooral na e clase di trahado humilde cu ta lanta sushi eyfo.
De Cuba a subraya cu e decision cu e minister aki a tuma, y cu hopi hende tabata grita pa cera “prikibos”, awo cu a wordo cera, a hale 500 meter mas pariba.
De Cuba a señala cu esaki so no ta nada. E curazon d e materia aki ta cu tin un NV, un Ministeriele Beschikking, di dia 16 di April 2020, cu ta bisa claramente cu SERLIMAR ta esun cu tin e vergunning y e hinderverordening y no un empresa priva.
Diego de Cuba a remarca cu locual ta pasando na Seroe Teishi, e NV aki ta bisa cu ta Serlimar ta esun cu tin cu ehecuta e trabao aki y no un otro compania, locual, absolutamente, no ta sosodiendo.
E lider sindical a indica cu aki nan ta hungando cu e empleadonan di Serlimar tambe, pasobra den e besluit ta reitera cu e departamento publico Serlimar tin e vergunning.
De Cuba a expresa cu tur hende sa kico ta pasando. Y e situacion di Aruba tambe tur hende conoce, unda cu aworaki tin mas dump cu nunca, na Aruba, y el a bira impagable. Si bo ta bay traha un cas, pa e grootveld cu mester tira afo bo tin cu paga un capital. Y e companianan cu ta haci e trabao ey no tin opcion pasobra ora nan a yega eynan a tira e sushi afo, no ta bay cobra pa e tonelada di sushi cu tin eynan.
De Cuba a expresa cu “trash cu cash” ta sona masha bunita mes, pero mester wak si e ta bay funciona en realidad. Si e no funciona, tur e teritorionan aki unda e sushinan ta wordo deposita, manera hero, aluminio, plastic, etc., lo crea un situacion unda tur e companianan ta bay den bancarota, anto kico ta bay pasa cu tur e sushedad cu tin eyriba, cu mester keda pa recicla? Kico tin précis den e contratonan STA no sa.
“Pero e hecho ta keda cu tin un bruhacion enorme! Si, hopi hende a grita cera prikibos, cera prikibos, pero bo ta cere y hale 500 meter mas pariba”, De Cuba a reitera. El a agrega cu STA ta tratando e asunto aki mas di cerca pasobra, nos ta puntra nos mes con ta posible cu un negoshi cu tabata genera di 4 pa 4.5 miyon pa aña, aworaki tin cu paga 6 miyon pa aña, na un tercer compania pa haci e trabao eynan”, De Cuba a remarca.
Riba e puzzle aki, ningun minister por duna un contesta fiho di con esaki por a bay asina aki, segun Diego de Cuba. “Nos por compronde cu Minister Arends a hereda un situacion hopi fastioso pero e splicacionnan cu e sindicatonan kier haya, nos no ta hayando, y vooral STA no ta hayando un contesta convincente”, Diego de Cuba a comenta.
