PHILIPSBURG: Gobierno di e isla di St. Maarten a manda un carta pa Secretario di Asuntonan di Reino, Alexandra van Huffelen,
cu un proposicion pa elimina e reduccion di 12.5 porciento di ambtenaar y gelijkgestelden di sector publico y entidadnan.
E reduccion den salario aki cu a drenta na vigor na 2020, tabata parti di acuerdonan haci cu Gobierno Hulandes a cambio di sosten di liquidez pa yuda e pais sobrevivi e efecto di e pandemia di Covid-19.
Prome Ministro Jacobs a bisa cu Gobierno ainda ta sperando riba un contesta pa cu su proposicion. Como cu e ta un proposicion, esaki tin di wordo atendi den Conseho di Ministro di Reino, pero Gobierno di Philipsburg a substancia esaki cu lo mas hopi data posible, y tambe informacion di Ministerionan relevante, y nan ta spera di por haya un contesta positivo di Den Haag riba esaki.
Gobierno di St. Maarten a enfatiza den e carta, cu e principio di solidaridad bao di cual e condicionnan a wordo imponi, ya no ta existi mas. Pesey Gobierno kier elimina e medidanan ey. Ya caba nan a sali di e fase di solidaridad pa cual el a wordo implementa. Nan a cumpli cu tur e otro condicionnan pa ricibi sosten di liquidez e tempo aya. Te asina leu nan no mester a busca sosten di liquidez mas.
Claro cu ningun hende sa kico futuro ta trece, pero Gobierno di e isla ta kere si cu mirando e epoca economico cu mundo ta aden aworaki y cu ta impacta St. Maarten tambe cu costo halto di combustible y di cuminda, ta determinante pa pueblo, pues aki Hulanda lo no por usa mas e principio di solidaridad.
Encuanto pago di vakantie dagen, Gobierno di St. Maarten a bisa cu nan ta den combersacion cu Sindicatonan, riba loke ta posible pa e aña aki, pero lo no kier haci ningun anuncio ainda riba esaki. Pero esey tambe ta algo cu Gobierno ta trahando pa kita e medidanan ey. Si acaso nan no por wordo elimina segun tempo stipula, e ora un otro solucion lo wordo busca.
St. Maarten a informa claramente na Secretario van Huffelen, cu e eliminacion di e medida di 12.5% aki ta solamente pa ambtenaar y trahadornan di entidadnan subsidia pa Gobierno. E no ta pa esnan cu ta ricibi top salario, y no pa e politiconan eligi, etc. Esaki nan a mustra claramente di comienzo na Van Huffelen.
Tin di corda cu na comienzo di e Pandemia, tanto Ministro y demas oficialnan eligi a tuma un reduccion di 10%, y despues un adicional 15%. St. Maarten no ta pidi pa eseynan wordo poni bek, y lo keda asina pues cu esey por lo pronto te ora cu hiba combersacion riba esey. E peticion awor haci na Den Haag ta pa e empleadonan.