ORANJESTAD (AAN): Siman pasa y tambe den weekend, varios isla den Caribe a emiti advertencia pa cu viaheronan cu ta pensa di bishita Republica Dominicana,
pa nan tene cuenta cu ora nan regresa, pa nan no bin cu nada di producto di cuminda traha di carni di porco. Tambe algun ta pidi viaheronan, cu si acaso nan a bishita un criadero di porco, pa anuncia esaki ora di yega nan isla bek.
Na Republica Dominicana, riba Dialuna 9 di Augustus ta sperando yegada di un specialista di Spaña, cu ta wordo manda pa Agencia FAO (Food and Agriculture Organization) di Nacionnan Uni, pa asina duna guia con pa elimina e brote di e malesa African Swine Fever cu ta afectando porconan na casi henter Republica Dominicana.
Un Comision a worde lanta na Republica Dominicana pa atende e brote di malesa di porco, y nan a laga sa cu e yegada di e specialista Spaño lo duna nan informacion riba e vacuna cu e ta trahando riba dje pa stop e malesa di porco aki di sigui plama. E malesa aki ta afectando hopi criadero sea industrial y tambe esnan cu ta criando porco na nan cas na e pais di Merengue.
Un di e trabaonan di e Comision ta pa coordina e forma cu ta sacrifica e porconan cu tin e malesa, y e criadero lo haya cierto suma di Gobierno pa cu esaki.
Diamars mes, via di Banco Agricola lo cuminza duna na pueblo di Cotuí na provincia di Sanchez Ramirez, e pago di compensacion economico segun e prijs actual di porco, pa asina e criaderonan no wordo perhudica economicamente.
Na pueblo di Moco, a identifica solamente un foco di contagio, y pesey autoridadnan ta sigui reforzando e plan di contingencia pa mitiga e virus di sigui plama.
Nan ta desinfectando areanan grandi, y aki ta usa heavy equipment, equiponan di seguridad, pa asina haci lugarnan di criadero, y tambe vehiculonan cu nan ta transporta porco aden.
Pa e plan contra e malesa di porco aki, Gobierno Dominicano ta conta cu apoyo tecnico y economico di Organizacion Internacional Regional di Sanidad Agropecuaria (OIRSA), tambe di FAO di Nacionnan Uni, y USAID di Merca.
