Andres Geerman di Management Team Colegio EPI:
- Pa medio di programa internacional
ORANJESTAD (AAN) Señor Andres Geerman, Management Team di Colegio Profesional Intermedio (EPI), den entrevista cu DIARIO a referi na e experiencia di studiante hunto cu algun docente, a bay core stage pafo di Aruba, loke a inclui traha. Esaki a base di un programa internacional den cual scol ta participa. Recientemente, un grupo a bin for di un biahe di estudio y trabao.
Meneer Geerman a expresa cu prome cu nan a haya e programa aki, tabata un soño cu scol tabata tin, di por a bay den exterior. Prome nan a kere cu ta un of dos mucha so por a bay, y nan ta contento cu ta 11 studiante nan a logra y den futuro nan ta pensa di manda 20 cu e programa internacional aki.
Geerman a comenta cu nan tin esun di Erasmus caba, y tambe di Iberostar tambe, y nan kier pa entre 30 pa 40 studiante pa aña bay afo.
“Loke nos ta ripara ta cu e ta yuda e alumno na un manera hopi controla, pasobra nos ta zorg tur cos pa nan, kiermen nan no ta bay riba nan mes, nan ta bay nan lugar, haya nan trabao, y door di control’e nan por siña hopi mas y weita hopi mas positivo mas afo. Nos sa tambe cu e ta cambia nan. Un hende cu bay siña y traha afo, ora e ta bolbe ta bin cu full un otro experiencia”, meneer Geerman a señala.
El a comenta cu loke ta pasa cu nos hendenan cu ta traha den industria na Aruba ta, cu nan no ta haya chens di bay afo. Por ehemplo, nan ta keda 20 aña den e industria, por ehemplo den front desk pero no a haya chens di bay afo. Si bo haya un chens di bay afo e ta habri bo mente.
El a menciona cu awo no ta pa Hulanda so, pasobra Erasmus ta duna nan oportunidad pa bay henter mundo y Caribe tambe.
“Nos meta ta, pa tur mucha cu ta dispuesto haya chens. Nos no ta worry si nan por of no, nos ta zorg pa nan. E ta un beurs, unda e studiantenan no tin un gasto riba nan lomba y e experiencia aki nan por hib’e, nan a wak con e trabao ta. Mayoria a traha afo, kiermen nan por papia y bisa con e ta eyfo, nan sa e ora ey e cambio, e cultura, y nos kier bisa cu pa Colegio EPI ta un experiencia hopi grandi pa nan tin’e”, meneer Andres Geerman a expresa.
