Segun señora Julienne Panneflek di IVA a informa:
- Personanan cu ta inyecta Ozempic sin ta competente por haya boet te cu 500 mil Florin
ORANJESTAD (AAN): ‘Voorbehoude handeling’ ta tratamentonan medico cu hopi riesgo cu no por wordo duna pa cualkier persona. Segun Capitulo 4, articlo 25 di Landsverordening Beroepen en Gezondheidszorg, ta duna un lista di tur e voorbehoude handelingnan. Inclui den e lista aki tin dunamento di hangua. Den articulo 26, 27, y 28 ta indica e lista di profesionnalnan autorisa y competente (bevoegd en bekwaam) cu por duna hangua entre otro un docter. Bou di docter ta cay docter di cas, specialista, dentista y partera (verloskundige).
Inspecteur di Cure & Care di IVA, señora Julienne Panneflek, a splica cu no solamente e profesionalnan aki mester ta autorisa y competente pa duna hangua, pero tambe nan mester ta registra na AruBIG. Un dentista cu por duna hangua, sea ta Intramuscular (IM), Intravenous (IV), y Subcutaneous (SC), si e no ta haci esaki regularmente, e no ta keda competente pa duna hangua.
Enfermeronan tambe mester keda haci nan mes competente pa keda practica e voorbehoude handelingen, entre otro duna hangua. Sinembargo, diferente na un dentista, mester haci esaki bou di ordo di docter.
El a enfatisa cu aunke un persona sigui curso con pa inyecta un persona y obtene un certificado, esaki no ta dun’e autorisacion y hacie competente pa haci esaki. Inyecta un persona tin riesgo grandi cu por haci hopi daño na un persona.
Ultimamente, hopi hende na Aruba, entre otro spanan, salonnan di beyesa, of cualkier persona, cu ta duna botox y Ozempic entre otro, cu ta trata di inyeccionnan. Señora Panneflek a expresa cu prome cu un ciudadano bay cerca un persona cu ta practica esakinan, e mester verifica si e persona ta certifica, autorisa, competente, y regista na AruBIG.
El a enfatisa cu si esaki no ta e caso, y si tin duda, e ciudadano por meld esaki den forma anonimo si ta desea na IVA entre otro via nan website, dunando informacionnan mas specifico posibel di entre otro e persona cu ta duna e inyeccionnan aki y adres corecto. IVA lo haci investigacion necesario y por tuma diferente medida, entre otro boet maximo di 500 mil Florin, pa personanan cu ta duna inyeccion sin ta autorisa y competente.
