Gino Goeloe di Wit Gele Kruis:
ORANJESTAD(AAN): Den un entrevista director di Wit Gele Kruis (WGK) Gino Goeloe a indica cu pa varios aña WGK ta monitor e casonan di diabetis na Aruba, unda cu actualmente 8% di nos comunidad ta sufri di diabetis, pero cu si bo wak esaki realmente, mester pone 8% mas riba esaki, pues 16% e ta.
“Nos ta bisa esey pasobra si nos wak caba e parti di sobrepeso y obesidad na Aruba e ta 80% cerca adulto y 50% cerca mucha”.
Esaki ta un señal cu nos tin cu bay enfoca hopi riba nos muchanan cu tin sobrepeso of ta obeso, pasobra eynan tambe nos ta haya alarmanan di muchanan cu ta sufri di sucu halto, segun Goeloe.
El a sigui bisa cu pa varios aña WGK a enfatiza cu mester bin un enfermero profesional banda di e docter di cas y cu esaki ta bayendo hopi bon.
“Toch nos ta sinti falta cu e docternan di cas tin mester di mas personal di sosten den nan practica di docter”.
Actualmente nos tin 38 di e asina yama praktijkondersteuners cerca e docternan, pero pa bo guia a pashent bon y dune e tempo tambe cu e tin mester di dje mirando e seriedad di diabetis, un bon sosten sigur ta necesario, segun e director di WGK.
El a sigui bisa cu e praktijkondersteuner ta tuma 45 minuut cu e pashent pa na dado momento check tambe si bo mama, bo tata, bo wela etc. tambe tabata tin sucu.
Esaki pasobra e por ta algo genetico, of debi na e hecho cu e persona ta sobrepeso dimas of ta obeso.
“Cerca hopi hende cu ta sufri di obesidad, e sucu ta subi y pesey nos tin cu bay wak esaki tambe den futuro, cu ta algo cu semper WGK a bisa”, segun Goeloe.
El a splica cu e complicacionnan di diabetis ta algo cu mester para keto riba dje.
E ta cuminza cu bo nervionan, unda cu bo ta perde gevoel den bo pia y pesey hopi biaha ta bisa e pashent di diabetis pa e no caba pia abao.
Si bo no tin gevoel bao di bo pia bo por trapa riba un clabo mes y no sintie, segun e director di WGK.
El a sigui bisa cu pesey un diabetico semper mester controla su pianan.
Tambe ta importante pa vigila bo sistema cardiovascular, pasobra bo adernan ta cera y asina bo por haya un stroke of atake di curazon.
Goeloe a splica cu un diabetico mester pone atencion na su riñonan, pasobra e adernan chikito ta wordo blokea y esey por tin consecuencia pa e riñonan, cu ta pone cu pashentnan diabetico por bira pashent di dialisis tambe.
