*San Nicolas ta e distrito cu mas tin mester di ayudo
ORANJESTAD (AAN): Presidente di San Nicolas Business Association (SNBA) Errol De Freitas ta haya cu ta ora pa cuminsa desaroyonan importante na San Nicolas y pesey el a entrega un plan na oficina di BID, destina na Gobierno.
Den un entrevista cu DIARIO de Freitas a splica cu desde e refineria a cera, tabata tin momentonan dificil.
“Si bo weita rond di nos isla, San Nicolas ta e distrito cu mas tin mester di ayudo actualmente”.
Nos ta yama nos mes e ultimo frontera, kiermen aworaki tur hende tin bista y nos tin masha hopi contacto cu hendenan cu ta interesa, pero importante tambe ta cu nos mester tin un comunion cu Gobierno, pa nan tin un bista di locual nos ta haciendo y weita kico ta e low hanging fruit, segun e presidente di SNBA.
El a splica cu hopi di locual SNBA kier haci no tin ni mester di presupuesto.
“Nos organizacion no ta bin pa pidi Gobierno placa, sino nos a bin a duna Gobierno proyectonan cu nos por uza y ta na beneficio di un y tur”.
Nos enfoke ta riba caya principal na San Nicolas, Carnival Village, Beachnan den Colony, Food Court, Seroe Colorado y e refineria, segun de Freitas.
El a sigui bisa cu e vision principalmente ta pa enfoca riba nos pueblo y nos bishitantenan tambe.
Segun e presidente di SNBA, mester corda cu San Nicolas ta e ultimo frontera y nos tin cu mantene e herencia y cultura cu nos tin, cu ta uni nos pueblo.
El a splica cu turistanan no ta bin Aruba pa nos perfeccion, sino pa nos imperfeccion.
“Si bo wak e desaroyo pa Noord y Palm Beach, e ta desaroyo masha bunita mes, top of the line”.
Sinembargo hopi bishitante kier wak e otro partinan di nos isla y nos tin cu mantene esaki mas simple posibel, caminda nan por sinti nos musica, nan por purba nos cuminda y nan por disfruta di nos cultura.
Tur e plannan ey nos tin completamente cla y nos a pasa esaki over pa Gobierno, segun de Freitas.
