Darren van Ommeren, Presidente:
ORANJESTAD (AAN): Segun Presidente SMAC, Darren van Ommeren, SMAC tambe ta sostene e campaña di conscientisacion di Fada y Stichting Zinnia y ta yuda manda e mensahe pa nos comunidad durante e temporada di Carnaval y alaves ta uni na e companianan di seguro cu tambe a uni pa e causa comun aki.
Diamars ultimo, BAR (Bo Amigo Responsabel) di Fada y Amigo Didi di Stichting Zinnia a uni pa haci e mensahe di ‘Don’t Drink and Drive’ mas fuerte no solamente durante temporada di Carnaval sino durante henter aña 2026. Señor van Ommeren a expresa cu mensahe asina ta hopi poderoso especialmente den temporada di Carnaval cu ta uni mas hende na unda tambe cu hopi hende ta haci uzo di alcohol y tin e maya di stuur bou di influencia.
Segun el a expresa, tin diferente manera cu por yuda pa evita pa stuur mientras ta bou di influenica di alcohol. Entre otro bo por uza bo BAR y bo Amigo Didi, e amigo responsabel ey cu nos tur tin cu no ta bebe. Huur un bus pa hunto cu amigonan of famianan yega cas sano y salvo of haci uzo di e diferente servicionan cu tin di transporte.
“Sali di cas y bay disfruta di Carnaval, apoya nos musiconan y participantenan pero tene cuenta cu bo responsabilidad y no bay stuur auto despues di a disfruta Carnaval, señor van Ommeren a expresa.
Van Ommeren a remarca cu e dos instancianan cu ta carga e campaña aki, esta Fada y Stichting Zinnia lo haya e sitio preferencial cu nan ta desea den e paradanan pa nan haci nan promocion y conscientisacion pa e mensahe yega na e publico carnavalesco.
