ORANJESTAD (AAN): E siman aki, Fundacion SKOA ta informa mayornan cu den e ultimo siman di scol entre 6 cu 10 di juli,
por haci peticion pa cambia nan yiu(nan) di scol.
Loke mester haci: Pa cambia oficialmente di scol mester haci esaki via e cabesante di scol. E peticion di cambio di scol lo wordo procesa digitalmente via nan systema central di SAS. Pa haci e peticion oficial di cambio di scol mayornan mester acerca e cabesante di scol entre 6 pa 10 di Juli 2026.
Tur peticion lo wordo procesa segun e secuencia di entrega, pues mas trempan haci e peticion mas trempan esaki lo wordo procesa. Importante pa tene na cuenta cu peticion pa cambio di scol no por wordo haci durante vacacion di scol.
Documentonan necesario: Tin mester di (*) Uittreksel bevolkingsregister (papel di Censo 5,-). (*) Copia di Zorgpas AZV of seguro priva pa aña escolar 2026- 2027. (*) Prueba di pago di aña escolar (schoolgeld) 2026- 2027.
Despues cu a cumpli cu e rekesitonan mayornan lo ricibi un respuesta pa cu e peticion di cambio di scol despues di 10 dia di trabao. Despues di esaki lo ricibi un carta di ubicacion y por continua na inscribi e yiu(nan) na e scol nobo.
Otro Schoolbestuur: Mayornan cu tin yiu(nan) inscribi na scolnan cu ta resorta bou di otro schoolbestuur por haci inscripcion pa un scol di SKOA via nan website di www.skoa.aw
SKOA ta e organizacion di educacion mas grandi na Aruba cu ta ofrece educacion di calidad halto. SKOA tin un curiculo completo cu ta enfoca ariba e desaroyo y crecemento general di cada alumno y studiante. SKOA ta enfatisa su balornan Catolico, comunicacion na nivel multilingual, inclusion, innovacion y tambe actividadnan extra-curicular.
Como mayor bo por ta sigura cu bo yiu(nan) lo ricibi un educacion completo na SKOA. Si bo kier pa bo yiu experiencia un forma diferente pa siña y discubri su potencial aplica na SKOA.
Pa haya mas informacion di tur e scolnan cu ta resorta bou di SKOA por bishita nos website www.skoa.aw. Pa contact nos directo por yama nan 523-1800 durante orario di oficina.
