Directora di Impuesto Luenne Gomes-Pieters:
- Nan tur por haya cobranza adicional cu boet
- Cu acceso online bo no por tin excusa valido
ORANJESTAD (AAN) Drs. Luenne Gomes-Pieters, Directora di Departamento di Impuesto (DIMP), den conferencia di prensa a splica cu un contribuyente cu no ta cumpli cu e declaracion definitivo di belasting, of provisional, lo por haya cobranza adicional of inclui un boet cu ta pa un maximo di 2.500 florin pa no entrega e formulario y un maximo di 10 mil florin pa no haci e pago corectamente.
“Loke pa nos ta un tiki preocupante, ta cu nos ta awe dia 29 di Juli faltando tres dia nada mas pa e declaracion aki wordo entrega finalmente, y den nos sistema nos ta wak cu tin un cumplimento di 56% so, di tur contribuyente comercial cu tin cu entrega nan formulario di winstbelasting.
Tin un incumplimento di 44% cu ta representa 4.534 contribuyente comercial cu falta ainda pa entrega nan formulario di winstbelasting. No ta contribuyentenan individual sino contribuyentenan comercial, cu nos ta verwacht cu ta custumbra caba di entrega nan formulario den forma di papel, of cu tin un asesor fiscal cu por yuda nan pa por entrega e formulario aki. No tin mucho cambio den e formulario, pues nada a cambia drasticamente, cu por splica incumplimento riba e tereno aki”, Luenne Gomes-Pieters, director, a señala.
El a sigui bisa cu di e 44% (4.534 contribuyente) tin 3.451 cu tin un account activo cerca DIMP bo impuesto portal. “Pues no tin un excuse of argumento valido segun Departamento di Impuesto, pa nan por keda sin declara mirando cu nan ta custumbra cu nos portal, nan tin un cuenta activo y nan lo por haci declaracion di un manera mucho mas facil y mas lihe”, Luenne Gomes-Pieters a declara.
El a declara cu di e 3.451 contribuyente aki tin 883 cu tin un consehero fiscal. “Pues no tin un otro motibo valido of argumento pa no entrega, y nos ta mira cu tin 2.883 contribuyente cu no tin un consehero fiscal pero si tin un account valido cerca nos den bo impuesto portal”, Gomes-Pieters a señala.
“Pues, nos kier haci un apelacion na tur esnan cu ta wardando ainda, cu no tin nan cuentanan anual cla, of cu ta bezig ta wak con nan por entrega nan formulario di winstbelasting, pa haci esaki mas pronto posibel, pa por evita un boet sin cu tin mester”, Directora di DIMP, Luenne Gomes-Pieters, a remarca.
