Parlamento mester ta fortalesa di Pueblo den crisis pisa --- *Futuro ta entrega responsabilidad mas grandi na Parlamento --- *Insiguridad mundial ta exigi vigilancia continuo y accion necesario
ORANJESTAD(AAN)—Cada rato cu pasa, mundo ta den un suspenso mas grandi. Un realidad cu ta alcansa tur cas di famia y tur ciudadano cu ta puntra nan mes kico futuro lo trece.
Den e conhunto di problemanan internacional serio, futuro ta entrega un responsabilidad mas grandi na Parlamento, cu ta wordo forma dor di hendenan cu a wordo directamente eligi pa representa y percura pa bienestar di e pais.
Manera semper nos a trece dilanti, Parlamento no a wordo introduci pa entrene Pueblo y hasta duna Pueblo ocasion pa hari of yora.
E situacion mundial ta presenta exigencianan nobo pa bon gobernacion cu mester wordo garantisa dor di Parlamento cu tin un tarea mas grandi cu bisa “pro” of “contra” na momento cu mester tuma decision.
E desaroyonan mundial no a wordo spera. Esaki ta nifica cu atrobe Aruba ta wordo confronta cu un situacion cu por considera como un impacto inespera, despues di e efectonan cu Covid-19 tabata tin pa mundo y pa Aruba.
Den e crisis Ukraine no solamente mundo mester atende cu confrontacion militar pero tambe cu cantidad di situacionnan nobo.
Relacionnan diplomatico a cambia. Peligernan nobo a presenta riba tur tereno y sigur riba e seguridad nacional di tur pais riba tur tereno.
Cambio den situacion mundial por afecta decisionnan cu a wordo tuma den Parlamento, cu mester ta bon prepara tambe pa carga e futuro nobo pa loke ta trata relacionnan den Reino.
Como legisladornan di Aruba, miembronan di Parlamento na e momentonan aki mester ta na haltura di e preocupacionnan serio cu ta biba cerca Pueblo di Aruba mescos cu ta e caso cu henter poblacion mundial.
Uza e situacion mundial actual pa hunga politica pa gana voto, no ta papia na fabor di ningun politico.
E costo y peso di bida cu ta aumenta cada hora cu pasa pa tur habitante di mundo y asina tambe pa e Arubiano, mester sostene mas cu nunca esfuersonan di representantenan di Pueblo, mescos cu vigilancia di loke ta pasa den e region imediato di e pais y e resultadonan cu e por tin pa Aruba.
Ta bira tempo pa den Parlamento, cu ta wordo paga pa traha full time pa Pueblo, cuminsa pone atencion na situacionnan regional, pa asina ta prepara pa resultado cu nan por tin pa Aruba.
Desaroyonan na diferente pais den cercania di Aruba, ta motibo pa preocupacion pa diferente motibo.
Eleccionnan cu lo wordo tene na Colombia ya ta duna indicacion cu por spera exodo di personanan cu no ta di acuerdo pa biba bou e posibel prome Presidente Comunista na Colombia.
Exodo di Venezuela ta continua mescos cu empeoramento di condicionnan di bida na varios lugar den Caribe.
Esaki ta topiconan cu ta biba cerca Pueblo di Aruba cu kier mira e nivel di Parlamento cu mester sirbi su interes.
Desaroyo mundial ta nifica impacto serio den casnan di Aruba, cu ta mira realidad mundial cambia diariamente y mester di representantenan cu den union di Parlamento no ta busca voto personal pero ta duna prueba di ta lucha pa bienestar general.
