Covid-19 ta keda un menasa scondi cu tin Europa na careda --- *Paisnan grandi prepara pa inflacion y otro ola pisa di Covid-19 ---*Costo nacional di Covid-19 mester habri wowo pa realidad na Aruba
ORANJESTAD(AAN)—Hende kier lubida kico Covid-19 a haci na 2020. E accionnan costo cu Aruba a tuma den cooperacion cu Reino Hulandes, a haci cu e resultadonan mas lamentabel di e malesa, a keda limita na Aruba.
Sinembargo, ningun pais na mundo tin e garantia kico Covid-19 por haci ainda y cientificonan ta sigui tur posibilidad pa un variante nobo di e Coronavirus.
Na 2020 hende no por a celebra dianan di fiesta debi na e hecho cu ainda mundo tabata den speransa di e vacuna, cu na 2021 a bira realidad pa un parti grandi di mundo.
E vacuna a evita un desaster mucho mas grandi di loke ta realidad na varios pais na mundo cu lo no conoce fiesta di Pasco.
Hulanda ya ta prepara cu e por drenta e zona mas pisa di e avance di e malesa, mientras su hospitalnan ta yena.
DIARIO mester bati alarma awe pa Aruba, cu mester sigui traha riba su turismo y mester sigui planea pa su futuro.
Na mes momento Aruba mester mira cuanto placa e tin pa por enfrenta cualkier realidad nobo cu por presenta.
Na varios occasion DIARIO a adverti pa e aumento drastico cu e malesa ta conoce rond mundo debi na e grupo grandi cu a nenga di vacuna y na momento cu un parti grandi di mundo mester mantene su mes na medidanan.
E vacuna a yuda pa reduci e cantidad di pashent cu ta drenta hospital y sigur cu ta perde nan bida. Pero personanan cu no ta vacuna ta pone nan bida na riesgo directo mescos cu personanan cu a vacuna pero tin condicionnan desconoci ainda cu ta stroba bon proteccion di e virus.
E situacion na paisnan cu conoce biaheronan pa y di Aruba, manera sigur ta e caso cu Hulanda, ta den un situacion alarmante manera ayera na momento cu DIARIO tabata cera su edicion tabata bini dilanti.
Alemania por ta otro pais cu ta lockdown manera ya ta e caso cu Austria, mientras hasta mundo petrolero ta tene otro brote di e virus na consideracion y ta subi y baha su prijsnan di petroleo cada momento.
E incertidumbre mundial ta crece y gobiernonan rond mundo mester sigui maneha paisnan, cu mester traha riba nan futuro pero teniendo peliger di resurgimento di Covid-19 na bista.
Expertonan ta di opinion cu Gobierno mester informa Pueblo di e gastonan cu Aruba tabata tin en total pa confronta Covid-19 y e hecho cu ripiticion di e gastonan aki lo ta practicamente imposibel si Aruba mes mester pone tur placa riba mesa.
Cuanto placa Aruba a gasta y cuanto entrada Aruba a perde exactamente? Con e situacion real di Aruba ta, mientras e ta recupera?
Pa hopi hende e realidad ta keda scondi sigur si tur sector no coopera, pa informa Aruba debidamente di Covid-19 cu hunto cu e inflacion cu ta dilanti porta, por basha tur planificacion pa 2022 abou.
Pueblo di Aruba mester biba cu e realidad cu ta espantoso na hopi pais na e mundo, di cual Aruba ta parti y den cual Covid-19 ta keda scondi pa ataca y sigui destrui hende, cu por keda pa resto di nan bida afecta pa un malesa cu ta keda invisibel pa hende cu e ta haci su victima.
