Entrevista cu realtor local Eva Wever...
ORANJESTAD (AAN): E ta un situacion cu a bin ta wordo sinti ultimo añanan. Enorme dificultad pa hendenan por haya cas pa cumpra, of cas pa huur, y hasta dificil pa haya apartamento pa huur. Tin hendenan cu ta bin bek Aruba for di Hulanda, pero bin topa cu un situacion cu no tin cas obtenibel na prijs cu tur hende tabata acostumbra cu ne antes.
Un situacion cu algun siman pasa hasta Ministro a elabora riba esaki, tambe a tende cu no tin tereno mas pa duna pa construccion, y tambe a tende cu tin monton di hende riba lista pa por haya un ‘Cas di Pueblo’, pero no tin disponibilidad e momentonan aki.
Con e realidad ta den mundo di Real Estate na Aruba e ora. Pa haya sa mas di e ‘Realidad tras di Escenario,” DIARIO a acerca e conocido realtor local, Eva Wever, pa haya sa di su banda e perspectiva actual di cas.
Segun Wever, e mercado di Real Estate na Aruba ta move hopi rapido, y cu gran parti di e atencion publico ta bay riba ‘listings’, prijsnan, y e soño di haya e cas perfecto. Pero tras di cada biaha cu laga clientenan bay mira (pues ta mustra cas), cada yamada, y cada transaccion, tin un historia di tempo, esfuerzo y dedicacion di profesionalnan di Real Estate cu ta traha nonstop pa sirbi nan cliente.
Pa brokers y agents, esaki no ta un trabao di 9 pa 5. E ta un compromiso cu ta sigui den anochi, fin di siman, y dianan di fiesta. Cliente naturalmente kier contesta rapido, disponibilidad inmediato, y atencion personal, y segun Wever, nan ta haci nan best pa entrega esaki. Sea door di responde mensahenan anochi laat, organizando varios showings den un solo dia, of core pa tur banda di e isla mustrando cas! E nivel di servicio cu ta wordo spera ta rekeri disponibilidad constante.
“Y hopi biaha, nos no ta haya resultado spera,” Eva a declara.
Cas pa famia inexistente: Segun Eva Wever, e berdad ta duro: “Casnan pa famianan local ta desapareciendo, casi inexistente.”
El a subraya cu demanda ta hopi grandi, pero loke tin ta prijsnan cu nos hendenan no por paga.
“Listings cu ta cay den un presupuesto realistico ta raro, pues inexistente. Pero ora nan aparece, nan ta bay mesora y a wordo cumpra.”
Eva Wever ta realtor local pa Bold Properties, y el a bisa cu e ta sigui busca forma di yuda comunidad cu e mercado local. “Pasobra, den un mercado dificil cu por tin e sentimento desalentador, Real Estate ta trata pa e hende tambe, pues no solamente propiedadnan. E dedicacion ta importante,” el a indica.
Eva lo sigui presenta pa famianan Arubiano, pasobra un cas nunca mester ta un privilegio fuera di alcance, como cu e ta algo cu cada famia merece.
Eva ta dedica pa hopi aña den yuda unda por den comunidad, specialmente apoyo pa mucha y famianan den necesidad. Pa e motibo aki, esaki ta mas cu un trabao - e ta personal. E ta kere cu cada famia local merece un oportunidad husto.
Riba e pregunta, kico ta su motivacion, den un frega di wowo el a contesta: “E ta simpel, Fe den Dios, su crianza y principionan, sirbi, y crea oportunidad, y biba cu proposito”.
E ta pidi esnan cu tin propiedad of cas cu ta cla pa bende den prijs pa hende local, y bo kier bende, nan por yam’e libremente na 560-0029.
