Señor Ivo Valdes (OPPA):
ORANJESTAD (AAN) – Den conexion cu Dia di Adulto Mayor, señor Ivo Valdes, Presidente di e Organisacion di Pensionadonan Publico Arubano (OPPA), a duna un entrevista impactante unda el a enfatisa cu e lucha di OPPA ta enfoca riba duna nos grandinan e balor, dignidad y cuido cu nan merece pa nan por pasa e ultimo fase di nan bida na un manera digno. “Nos grandinan a dedica hopi na e desaroyo di Aruba. Nan merece un trato bon y hustu,” señor Valdes a enfatisa.
Segun Valdes, ta preocupante cu hopi di nos adultonan mayor ta muri den circunstancianan straño, mientras cu instancianan relevante ta keda tranki. Y apesar cu instancianan ta bisa cu ta normal e tendencia aki pa via di edad halto, nan no ta haci investigacionnan di kico of pakico un grupo grandi asina ta muriendo.
Valdes ta pone enfasis riba un situacion alarmante: hopi adulto mayor no ta muri simplemente pa motibo di envehecimento, sino pa falta di cuido medico apropia. E sistema di cuido ta faya nos grandinan. “Esaki ta e problema cu nos tin te ainda na Aruba. Nos ta bisa nos calidad di cuido ta bon pero no ta pa tur hende”.
El a agrega cu hopi adulto mayor y famia tin miedo pa papia. Pa cua motibo Aruba ta keda tranca den un situacion cu no ta bin cambio. “Y nos kier un cambio. Un cambio pa e hendenan cu a dedica nan tempo na nos yiunan y na construccion di nos pais. Dus nan merece un bida drechi”.
Di e entrevista, un mensahe a bay tambe pa e generacion hoben: “Esaki ta e realidad di nos grandinan na Aruba. Si nos kier un miho futuro pa nos na Aruba, nos hobennan tambe mester yuda cambia e situacion y duna nos grandinan e balor cu nan merece. Y esaki ta cuminsa na cas cerca cada un di nos,” señor Valdes a expresa.
