Dia di Labor: Dia pa dia hopi persona mester lucha pa haya un trabao cu nan ta busca of mantene loque ya nan tin.
Tin hende ta traha den oficina of fabrica, mientras cu otronan ta haci trabaonan na cas, tin negoshi propio entre otro.
Ta berdad cu tin hopi persona cu sa den ki ramo nan ta gusta traha, pero tambe tin un otro grupo importante di persona cu ta cuestiona pakico nan mester hacie. Cada un ta traha pa diferente razon y esakinan ta varia segun nos prioridadnan.
Tin personanan cu ta prioriza pa por tin un stabilidad economico, mientras cu pa otronan lo importante ta pa gana experiencia den nan campo profesional.
Ta hopi comun cu esnan cu a caba di gradua di universidad of otro school ta buscando desesperadamente trabao den algun compania cu ta permiti nan gana e experiencia cu nan mester pa desaroya nan potencial y tur loque nan a siña.
Nos tur sa cu awendia nada ta gratis. Periodicamente nos mester paga un serie di recibonan, entre nan coriente, awa, luz, telefoon etc. Debi na esaki hopi biaha tin personanan cu mester traha oranan extra of haya un di dos trabao pa asina nan por logra paga nan debenan. E situacion aki ta basta comun den e famianan den cual ainda nan yiu ta bayendo scol y cu ta mayornan ta encarga di nan, tanto den nan educacion, como di nan bienestar.
Despues di caba un carera profesional hopi hende ta nota cu nan no ta posee cierto potencial pa cuminza cu nan propio empresa of negoshi, y ta pa e motibo aki nan ta bin un opcion pa busca un trabao y pa asina spaar loque nan por pa mas dilanti haci e inversion necesario pa cuminza nan propio negoshi.
Y akinan bo ta ripara cu cada hende ta traha pa diferente of varios razon. Trabao ta necesario pa un y tur y tanten cu bo por hacie honestamente y cu amor, sigur e lo duna bo satisfaccion pa sigui traha pa bo futuro.
