ORANJESTAD (AAN): E siman aki, Sindicato Alvast cu asombro a tuma nota di un boletin Utilities Aruba N.V. pa bisa cu nan no ta interveni riba asuntonan interno di recurso humano den e companianan estatal NV.
Sindicato Alvast kier a refresca memoria di e director di Utilities Aruba NV, con aña pasa el a instrui sr. Irausquin (director di NV Elmar) pa kita e 12.6% unilateralmente for di trahadornan, sin cu trahadornan a duna e autorizacion pa kit’e.
Di con a duna NV Elmar opdracht pa trahadornan/deelnemers cu ta den pensioenfonds di SBA pa bay over na AFGA a base di Art. 17 inciso 1 y awor kier pa trahadornan paga back 50% di bruidschat.
Di con ariba e herinchting sin cu ta tin sociaalplan of un overleg cu vakbondnan of un acuerdo lo kier purba pasa via un carta hinca den e payslip di trahadornan e plaatsen procedure cu e kier duna nan fin di luna aki.
E director di NV Elmar no por haci nada ariba su mes sin aprobacion di director di Utilities y Raad van Comissaris.
Sindicato Alvast su reaccion ta, cu ta pone Utilities y Raad van Commissaris personalmente responsabel pa e maneho di e compania estatal, mirando cu a reuni cu Ton Royer y a trece tur e problemanan cu tin di compania y pa asina hunto busca un solucion of mehoramento, y drecha e comunicacion.
Pero loke Sindicato a bin ta ripara, cu e director di Utilities ta core pa su responsabilidad, envez cu actua manera un bon dunado di trabao ta core bula pipa.
Sindicato Alvast ta kere cu no tin control ariba e manehonan di companianan estatal, ta wheel & deal so tin.
Pesey Sindicato tin pregunta na Gobierno, si acaso ta via e Bureau Integriteit Aruba (BIA) e Sindicato Alvast por haci un petishon pa laga investiga e director relaciona cu e Departamento di Magazijn na NV Elmar, mirando cu a tuma un persona como “Head of Purchasing and Logistics”, kende durante su prueba di dos luna no a pase bon, y toch a tene na trabao, pero den otro function cu ta mas abao. Esaki Sindicato ta haya cu e ta un fraude administrativo, pasobra no tabatin vacatura pe, pues ta haci y deshaci.
Alvast kier sa, si acaso esey ta integridad, y ta puntra tambe unda e governance code a keda.
