ORANJESTAD (AAN) – Den e Sindicato di Maestronan di Aruba “SIMAR” a devela un plakkaat na honor di Madonna Stephens, awo den feliz memoria.
Y tambe a inaugura e “Plaza Madonna Stephens” den e sede sindical.
Jose Fernandez Perna a duna DIARIO un perfil di e trayectoria interesante di Madonna Stephen, como docente, presidente di SIMAR y miembro activo di e Directiva.
Jose Fernandez Perna tabata colega di Madonna como docente na Instituto Pedagogico Arubano, y tambe den e Comision Maneho di Enseñanza. E mes conoce Madonna for di aña 1974 tempo cu el a bira miembro di FLA cu despues a bira SIMAR.
Despues Fernandez Perna a bay Hulanda y ora el a bin Aruba bek el a bolbe topa cu Madonna na SIMAR, y semper el a milita den sindicato di maestro. Di aña 1977 te 1984, Madonna tabata presidente di SIMAR, pero despues cu esey e tabata miembro di e directiva, y despues di esey a sigui ta miembro activo di SIMAR.
Tempo cu Madonna a fayece, Fernandez Perna a haci un observacion cu lo ta bon pa nombra un parti di SIMAR, por ehemplo e plenchi, cu su nomber pa asina aki locual el a nifica pa enseñanza. “Y awe, cinco aña despues, nan ta bay devela un placa cu mi ta wak den e murayanan pa asina e keda pa tur esnan cu no a conoce, miembronan nobo y esnan mas hoben pa nos pone esaki, den nos memoria colectivo di SIMAR”, Fernandez Perna a relata.
El a sigui bisa cu tabata tin un grupo cu a bay Hulanda y Madonna, na un edad hopi hoben, a bay cu e grupo aki, pa bira juffrouw di scol. El a recorda cu prome cu esey tabata e soeurnan cu e frerenan tabata den enseñanza. Madonna tabata un di e prome yiunan di tera cu a bay studia pa maestro di scol, y despues di dje tabata tin algun generacion te cu APA mes a cuminza na Aruba. El a profesionaliza su mes como docente di Ingles, pero tambe el a studia Ciencia Pedagogico y a sigui diferente curso di ley, esta Derecho.
“Tur esaki el a haci no pa su logronan academico, sino mas bien pa asina ey e por ta un miho educador. Y ya, for di e tempo ey, el a milita den sindicato pa e ta un miho sindicalista”, Fernandez Perna a agrega.
Na Instituto Pedagogico Arubano (IPA), Jose Fernandez Perna a sigui traha como docente di Ciencia Pedagogico y Madonna como Docente di Ingles. “Y nos a traha riba locual nos, como grupo, a propone na innovacion di enseñanza durante 20 pa 25 aña na IPA. Nos a sa di carga e innovacionnan aki, como Instituto Pedagogico, pero Madonna tambe den su otro funcion como miembro di e Directiva di SIMAR. Y den e sentido aki, mi por bisa cu SIMAR, atravez di Madonna, a participa y naturalmente, como docente di IPA, den tur e proyectonan di Innovacion; den e propio IPA, despues EPB, EPI, SHA, PRIEPEB, na un manera incondicional, basta cu e por a yuda mehora y hisa e nivel di enseñanza na Aruba”, Jose Fernandez Pedra a conclui.
