*Aworaki a cuminza cu Asociacionnan di Empleadonan
ORANJESTAD (AAN)—Señora Marilyn Wout, Relacionista Publico di Departamento di Integracion y Maneho di Stranhero “DIMAS”, a yama un conferencia di prensa, pa informa cu DIMAS ta bezig cu e Proyecto Piloto Portal.
Desde aña pasa nan a lanza esaki pa organizacionnan den Gobierno, manera Marina Real, SKOA, directivanan di scol, Hospital tambe ta haciendo uso di dje, y nan ta duna DIMAS feed back pa nan por mehora e portal.
“Na e momentonan aki nos ta asina leu cu nos a cuminza haci e pilot aki tambe cu Asociacionnan di Empleado. Por ehemplo e miembronan di AHATA nos a caba di incorpora nan siman pasa y e siman aki, unda cu nan miembronan a mustra interes pa duna e training pa traha cu e portal nobo di DIMAS, y nan por e ora e ey haci peticionnan di permiso tanto pa nan empleadonan como tambe famia di empleado”, Wout a splica, indicando via e portal nan por pidi permiso pa mas aña, di un te cu cinco aña.
“Ta importante pa bisa cu permisonan cu tin componente laboral, e persona lo mester haya un DPL positivo di mas cu un aña. Anto nos ta sigui cu e advies di DPL pa asina ey nos por procesa e peticion di permiso”, Marilyn Wout a señala.
El a reitera cu e siman aki nan a incorpora, exitosamente, e miembronan di AHATA, y el a gradici cu nan a colabora cu DIMAS, e miembronan cu a duna feed back caba, hopi valioso, cu DIMAS ta bay incorpora den e mehoramento di e portal.
Aki dos siman lo incorpora e miembronan di ATIA y despues lo sigui cu Aruba Food & Beverage Association, unda cu nan miembronan tambe lo haya training den e portal, pa asina nan por aplica pa e permiso di nan empleadonan y nan famia.
Atravez di e portal tambe nan lo por tin un seguimento di e proceso con leu e peticion ta canando, y nan lo por haya diferente documentonan cu ta di importancia pa e cliente, manera un orden di pago, pero tambe copia di e permiso lo por ta disponible pa e personanan.
Wout a indica tambe cu ta importante tambe pa e clientenan, personanan individual cu sa cu nan permisonan ta caducando pronto, pa pidi e dunador di trabao, e empresa, si e ta interesa pa doemee cu e pilot, pa bisa e dunador di trabao pa haci e peticion pa e trahador, via e portal.
“E ta hopi facil. Aworaki nos ta bezig controlando e traduccionnan pasobra nos ta bay inclui esakinan tambe den e portal anto na momento cu nos ta bay lanza e portal pa full pueblo di Aruba, e ora ey nan por haci e peticionnan, apart di e Idioma Hulandes, na Ingles y Spaño tambe”, Marilyn Wout a señala.
