Rubiella Troppenberg, Trahado Preventivo di FADA
Tema 2025 ta: “Life is a puzzle. Solve it drug free”
ORANJESTAD (AAN) Fundacion Anti Droga Aruba (FADA), a yama un conferencia di prensa, den cual srta. Rubiella Toppenberg, Trahado Preventivo di FADA a elabora tocante e siman di Bisti na Locura y Cinta Cora 2025 cu ta inicia dia 27 di October awo te cu dia 31.
E Siman di Cinta Cora y di bisti na locura ta aki tres siman, y e rueda di prensa aki ta pa informa comunidad kico tur por spera di e actividadnan aki di FADA.
“Nos ta hopi contento e aña aki cu e tema. E aña aki e tema ta ‘Life is a puzzle. Solve it drug free’. Enfasis e aña aki ta cu tur decision cu bo ta tuma den bida (principalmente esnan positivo) tin un impacto riba bo futuro. Eigenlijk nos mes ta e puzzle. E idea ta pa bo tuma decisionnan corecto p’asina bo puzzle ta uno bunita pa bo futuro” Rubiella Toppenberg a señala.
El a agrega cu FADA su enfoke semper ta keda cerca nos hobennan, pero esaki no ta kita cu nos adultonan y nos docentenan por participa. “Nos ta hopi contento y gradici cu e acogida di tur aña, y nos ta conta atrobe e aña aki conta cu boso sosten. Aki tres siman nos ta cuminza, dia 27 te cu dia 31 di October. E aña aki tin algun cambio chikito.
Hopi biaha nos ta purba bin cu cambionan grandi pa e temporada aki pero hopi biaha ora nos puntra bek cerca nos hobennan, cerca nos chikitinnan, nan ta hopi custumbra y nan ta gusta e siman ey, pasobra nan ta haya chens pa: uno, ta nan mes y dos, wordo recorda tambe pakico nan ta bisti e siman di ‘bisti na locura’.
Nos ta cuminza Dialuna, manera semper, e parti di bisti algo coral; algo cora ta demostra cu bo ta habri e siman y cu bo tambe ta para contra uso di droga. E di dos dia, dia 28 ta eigenlijk pa bisti sombre. Bo ta bisti sea un pechi, un sombre, loke abo tin, y si bo ta décor’e cu algo tambe por. Sea creativo, hopi biaha un pechi ta algo cu nos tin na cas, dus no mester ta algo cu bo bay cumpra completamente nobo; decora algo leuk of djis bisti un pechi, saca bo potret mustra cu bo tambe ta participa den e siman di cinta cora”, Rubiella Troppenberg a relata.
