Trahadornan ya no por mas
- Tin hopi cama di adultonan mayor den mal condicion
- Scarcedad di personal y casi no tin recurso
ORANJESTAD (AAN): E trahadornan ta sinti cu e presion aki ta asina enorme, nan no ta ricibiendo ningun sosten y speranza, y pesey mes riba Dialuna mainta a dicidi na tene un walkout.
E Cas di Cuido den Palisiaweg ta cay bao di Fundacion SABA, y e trahadornan a dicidi pa haci esaki pa asina por bati mas duro na e bel di alarma y hala atencion di tur stakeholder.
Y tur cos ta mustra di ta un aglomeracion di situacion cu a crea awor un berdadero crisis y cu e trahadornan ya no por soporta esaki. Aki nan ta referi na suficiente material, herment, y tambe hecho cu personal ta hopi scars.
Trahadornan a sali pafo y a papia cla y raspa. Nan ta preocupa cu e riesgo cu tur esaki ta trece na e cliente/pashentnan cu ta den na ncuido, pero tambe e peligro cu cada uno di nan como trahador tambe ta core eyden.
E trahadornan a yega di pone gerencia na altura na numeroso ocasion di e fayonan, pero nada ta wordo haci. E problemanan ta sigui dia pa dia, ta sigui acumula, y enbez di mehora segun promesanan di esnan cu ta maneha SABA.. mas bien e situacion ta empeorando. Y e cliente/pashentnan ta esnan cu lo por sufri na final di dia di tur esaki.
Tin hopi trahador haciendo nan best pa por funciona optimalmente bao di e condicionnan aki, pero e cantidad di casonan di trahadornan cu ta meld ziek ta escalando y esey so ya caba ta un parametro esencial pa mustra cu tin dificultad aki.
Dificultad cu ta hasta baha e calidad di cuido, pasobra tin menos trahador na warda pa atende tur pashent. Esaki claro ta trece retrazo den tratamento y con ta atende cada pashent/cliente den e lugarnan aki.
Decadencia di Materialnan: Trahadornan ta indica cu publico lo keda asombra di mira con den mal estado e camanan ta aworaki. Falta di diferente extra material pa e Casnan aki por funciona como debe ser segun protocol. Debi na e hecho cu no tin recurso suficiente, ta pone cu varios pashent/cliente ya caba ta keda sin ricibi e cuido adecuado cu nan merece di ricibi aki.
E falta di personal y recurso, a pone cu algun mester a cera parti di e Casnan di Cuido, pasobra no tin suficiente manpower pa handle e demas pashentnan. Y aki no por ni busca hende di uitzendbureau pa yuda tampoco.
De vez en cuando ta mira aviso ta sali cu ta buscando hende pa bay traha, pero reaccion cu ta drenta no ta yega. Y pa colmo a bin nota cu Fundacion SABA kier cuminsa acepta mas pashent. Siendo cu e trahadornan ya caba ta ‘sobrecarga’ den nan funcion.
Nan accion di Walkout ta un forma pa bati alarma aun mas duro. Y aparentemente Ministro Ursell Arends a tuma nota, y el a splica cu tanto Gobierno y tambe Fundacion SABA ta compromete nan mes pa resolve e problemanan aki. Nan ta vigilando di cerca e situacion pa sigura cu e servicio p’e adultonan mayor ta mantene cu e calidad adecua.
Con nan lo drecha e situacion agudo di falta di personal, esey no ta conoci. Pero Gobierno a indica si cu nan a transferi tur fondo pa SABA pa cubri nan gasto. Pero awor cu personal ta keha cu materialnan ta inadecua, ta bin cu pregunta e ora: Ta unda e placanan aki ta bayendo anto.
Na final, e trahadornan di SABA a finalisa nan Walkout despues di 2 ora.
