Post ta den dificultad financiero
*A nombra dos reemplazante interino
ORANJESTAD (AAN): Siman a habri cu e informacion, cu Post Aruba NV ta sin director. Empleadonan a haya memo cu e director, Guillermo Raymond no ta traha mas. Ningun hende a haya sa kico a socede pakico el a bay, sea a tuma retiro, of ta otro cos a socede.
Den oranan di atardi, Ministerio di Geoffrey Wever a emiti un boletin, cu ta contene e texto cu ta splica loke ta pasando y kendenan a tuma over temporalmente.
A ser mustra atrobe e mesun disco bieu, cu Post Aruba N.V. pa hopi aña ta pasando den dificultad financiero y mester worde reorganiza pa haci e compania financieramente y operacionalmente stabil.
Den cuadro di reorganizacion di Post Aruba N.V. diabierna ultimo a palabra, mientras cu lo inicia cu e proceso pa busca un director nobo pa Post Aruba N.V., cu lo traspasa e tareanan di e director di Post Aruba N.V., Sr. Guillermo Raymond, temporalmente pa Señora Esther Gomes y Sr. Ramoncito Croes.
Señora Esther Gomes actualmente ta legal manager na Post Aruba N.V. y Sr. Ramoncito Croes ta actualmente operations manager.
Ministro a gradici Sr. Guillermo Raymond pa su 40 aña di servicio na Post Aruba N.V.
Ministerio di Asuntonan Economico, Comunicacion y Desaroyo Sostenibel a priminti di lo mantene comunidad informa riba e desaroyonan di Post Aruba N.V.”
