Cuater hoben a completa cu exito programa piloto
ORANJESTAD (AAN) Na luna di augustus 2025, Sibari Foundation a cuminsa oficialmente su caminda na Aruba.
Sibari, nomber cu tin origen for di un palabra Arawak, esta ‘Siba‘ cu ta nifica piedra y ‘ri’ cu ta nifica fuerte, a wordo estableci pa señor Ricky Hoek, cu tin un trayecto largo den e sector social y como parlamentario, hunto cu coach, trainer y autor di Colours of our Heart, señora Wilga Zibel. E creacion di e fundacion a surgi for di e necesidad creciente pa mas cuido, sosten y oportunidadnan di desaroyo den e sector social, cu enfoke especial riba mucha y hobennan, sin laga mayornan afo.
Segun Hoek, Sibari Foundation ta enfoca riba impulsa crecemiento personal y profesional a traves di entrenamento y cursonan specifico. E enfoke no ta limita solamente riba e beneficiarionan directo, sino tambe riba e profesionalnan cu ta traha den e campo social, cu por beneficia di guia, sosten y formacion continuo pa fortalece nan trabou diario.
Durante 2025, e fundacion a lansa un programa piloto di 12 siman, cu a wordo ehecuta entre september y december. E proyecto a wordo dedica na mamanan hoben y a realisa cu colaboracion di ADRA Aruba, Fundacion Stima mi Guia mi y otro facilitadornan esencial.
Den e prome parti di e programa, señora Wilga Zibel a enfoca riba desaroyo di inteligencia emocional y proceso di sanacion di trauma. E di dos fase, bao guia di señor Hoek, a concentra riba habilidadnan practico cu por contribui na independencia economico, manera preparacion di cuminda, panaderia, hacimento di huña y cabey. Ademas, e entrenamento a trata tema manera liderazgo, cuido propio, comunicacion efectivo y habilidadnan basico di corespondencia, manera traha carta.
Di acuerdo cu Hoek, e combinacion di fortalecemento emocional y formacion practico ta prepara e mamanan hoben pa enfrenta futuro cu mas siguridad, sea pa bay studia bek of pa integra den e mercado laboral.
Diamars 3 di februari, e programa piloto a cera oficialmente cu entrega di certificado na cuater dama hoben cu a completa e entrenamento exitosamente: Lixaine Tromp (23), Oriana Ramirez (21), Divah Vlaun (19) y Ciclaine Semeleer (19). E participantenan a expresa cu e programa a contribui significativamente na nan empoderamento personal, mehora nan relacion cu nan yiu, famia y/of pareha, como tambe aumento di confiansa propio.
Sibari Foundation a confirma cu e iniciativa lo sigui y cu tur mama hoben lo por participa, independientemente di idioma. E programa di conciencia emocional introduci pa señora Zibel ta fundamenta riba mas cu dos decada di investigacion, experiencia personal y un compromiso profundo cu bienestar di e hobennan.
Den e curason di e metodologia tin e simbolo di e “diamante”, cu ta representa e balor intrinsico di cada persona, y e idea di “un pida puzzle”, cu ta reconoci cu tur individuo tin un rol unico y esencial den sociedad.
