Luenne Gomes-Pieters directora DIMP:
ORANJESTAD (AAN) – Directora di Departamento di Impuesto (DIMP), Luenne Gomes-Pieters, den entrevista cu DIARIO a expresa cu si tur hende ta cumpli cu nan pago di impuesto, nos tur ta paga menos.
Pero si gobierno ta mira cu entrada di impuesto ta cay atras, tin cierto medidanan cu mester wordo tuma pa por cumpli cu acuerdonan cu a wordo cera cu Hulanda, ora ta trata cu presupuesto di nos pais of di surplusnan.
“E ora ey nos tur ta bay haya cu un peso di belasting mucho mas halto, door di tasanan di impuesto cu ta bay subi mirando cu nos tin un ‘tax gap’ pasobra tin contribuyentenan cu no ta cumpli. Pues, nos ta bezig ta wak e cifranan aki y cu tin e oportunidad pa nos traha hunto cu otro departamentonan, cu ta duna vergunning na automobilistanan cu si no ta cumpli, mi no ta haya ta na su lugar pa nos tur cu ta paga, pa nan keda cu un vergunning, mirando cu nan no ta cumpli cu nan deber fiscal y e debernan cu nan mester cumpli cun’e pa tin e honor di tin un vergunning pa por transporta nos turistanan”, Gomes-Pieters a remarca.
Tin hopi factor cu por influencia e comportacion di pago di un contribuyente. “Bo ta wak cu e teoria riba tereno di compliance ta hancra den penalty system, kiermen, si bo no ta cumpli nos ta pone un boet, of tin e posibilidad di haci esaki, y esaki ta un forma pa e contribuyente por bin y paga. Tin cierto caso cu un boet di 50% di e pago di impuesto no ta funciona, y nos lo mester bay wak ki otro medidanan si lo wordo tuma pa por stimula e contribuyente, of por concientisa e contribuyente cu e tin cu cumpli cu su impuestonan. Un di nan ta e ‘voluntary compliance’ cu nos a saca caba pa un par di aña pa tin e posibilidad pa e contribuyente cumpli cu su pago”, director di DIMP a indica.
{gallery}Si tur hende cumpli cu pago di impuesto nos tur ta paga menos, pero si impuesto cay atras tin cu tuma medida{/gallery}
