Ricardo Croes:
*Economia di Aruba lo conoce un pilar nobo!
ORANJESTAD (AAN) – E politico y ex-parlamentario pa Partido RED Democratico, durante e gobernacion di partido MEP 2017-2021, señor Ricardo Croes, a reitera cu enfasis durante un entrevista cu DIARIO, cu si RED ta bolbe den e siguiente gobierno na 2025, e lo legaliza Cannabis aki na Aruba.
El a bisa cu durante su participacion den Parlamento RED tabata kier legaliza Cannabis no solamente medicinal, pero en general, incluyendo hemp. Segun Croes den e gobernacion anterior ningun politico tabata educa riba e tema di Cannabis den medicina, economia, y e posibilidadnan pa Aruba.
P’esey RED, aworaki pafo di Gobierno. El a cuestiona cu RED a firma un acuerdo cu Gobierno y cu Gobierno no a cumpli cu esaki, y RED no por a cumpli cu e pueblo. El a reitera y garantiza cu si RED Democratico ta bin bek den Gobierno de facto lo legaliza Cannabis y Aruba su economia lo conoce un pilar nobo.
