Frans Ponson di CUA ta alerta pueblo:
ORANJESTAD (AAN) – Frans Ponson, miembro di Comerciantenan Uni Aruba (CUA), tambe a elabora den un entrevista, tocante e BBO na frontera, cu gobierno kier introduci for di entrante 1 di Juni, segun Ponson ta indica.
El a bisa cu a bin cu e proposicion pa introduci BTW cu ta hopi complica, pero Gobierno kier a bin cune na December, na un prijs di 18%. Claramente, esaki lo a crea un caos pa pueblo di Aruba, y tabata imposible pa un sistema asina compleho, por a introduci’e den un luna.
Ponson a splica cu e tempo ey comerciantenan a bin cu un idea pa combati e mercado ilegal (economia informal). Por ehemplo benta di paña for di auto para na caminda, y si ta bay cobra pa importacion ta cosnan asina ta bay combati. No ta husto pa un compania cu tin cu paga huur, trahado, overtime y haci ganashi, paga BBO, belasting riba ganashi, etc., competi cu un mercado informal asina aki.
El a bisa cu ta gobierno y no e comerciante mester atende cu esaki pero e ta preocupante pa nan. Ta mescos cu gobierno a bisa cu entrante 1 di Januari no por tira sushi mas na dump, asina comercio a tende cu 1 di Juni gobierno ta bin cu un impuesto riba importacion. Anto nan ta bisa cu esaki ta idea di e profesionalnan, cu ta e comerciantenan a bin cu e idea aki. Ponson su pregunta ta na prome lugar, cu nan a bisa gobierno pa baha e BBO pero esey nan no a scucha pasobra nan kier mas placa. “Find, nos ta para tras di e idea aki, pero unda tur e gremionan na Aruba ta, cu tin yen di propuestanan. Nos por trece tur e ideanan di nos hendenan aden. Tin mil gremio na Aruba, ban scucha di tur, laga tur buta nan puntonan di preocupacion anto laga gobierno na final di dia tuma e decision toch. Pero ta iresponsable awe pa punta dede riba e profesionalnan cu te awe no ta parti di e ley, te awe nos no a wak’e ni sa ki advies tin, y awo nan ta bay introduci’e”, Ponson a remarca.
El a agrega cu si pa 1 di Juni, of 1 di Juli mes e comerciante no ta compronde e Ley, y tur hende no ta bon informa, e por bisa pueblo bon cla cu e ta bay haya un inflacion mas grandi cu e ta wordo pinta.
El a agrega cu e comerciante cu tin cu bay paga BBO na frontera ta bay inclui den su prijs y pueblo tin cu bay paga p’e. Awo, tin caminda tin cu paga p’e y tin caminda cu no. “Ta gobierno su trabao pa duna un training y haci esaki debidamente, eigenlijk scucha di tur e gremionan nan puntonan y no djis coi e punto so cu nan ta bay gana mas placa y punta dede bisa cu e profesionalnan a pidi esey”, Frans Ponson a reitera y remarca cu si Gobierno no ta siña di pasado y tuma decision pa loco, y introduci BBO na frontera 1 di Juni of 1 di Juli, pueblo ta bay sufri e consecuencia cu un inflacion barbaro.
