Gilbert Dirks, presidente di UEA:
ORANJESTAD (AAN) – E lider sindical di UEA, Gilbert Dirks, a reitera cu no ta NV Elmar a subi prijs di coriente sino WEB Aruba NV.
Kiermen, si Elmar baha prijs di coriente awe, e tin cu sacrifica y su trahadornan tin cu mendiga, mientras cu WEB si ta keda cu su prijs halto.
“E no por keda asina si WEB ta keda bende na Elmar pa kilowatt, por ehemplo, 50 cent y Elmar tin cu baha cu 30 cent, cual ta e sobrevivencia cu Elmar ta bay tin, aki un par di aña? E ora ey e trahador (na Elmar) lo perde trabao”, Dirks a acentua.
El a agrega cu si minister Wever ta haci esaki simplemente pa sostene un grupito cu ta cana su tras, e tin cu bay cerca nan tambe pasobra ora cu BBO subi y prijs di coriente tambe subi, nan ta hisa nan prijsnan. E ta bisa cu di con e minister no ta acerca nan y puntra di con nan no ta baha prijs di nan producto, pa e pueblo consumidor tambe por cuminza biba?
Dirks a señala cu e no ta kere cu aworaki e par di cen cu tin riba e tarifa di coriente, ta esun cu ta haci Aruba mas caro, sino e producto cu ta wordo bendi cerca e comerciantenan. “Esey ta locual tin nos aworaki cu un economia asina stagna y caro. E, como minister di Economia, t'eynan mester cuminza sondea y cuminza wak cada un” Gilbert Dirks a enfatiza.
Dirks ta premira otro situacion cu lo tin influencia pa Aruba, awo cu Merca ta den crisis. El a bisa cu si otro luna dia 11 of 12, Merca ta hisa su prijs di petroleo, minister Wever ta bay sali afo ta bisa “mi ta haya mi ta hisa prijs di gasoline” pa motibo di e crisis cu tin na Merca. “Pero cada bez cu bo hisa prijs di gasolin, bo sa bon bon minister Wever, cu e comerciante tambe ta esun cu ta bay hisa prijs di su producto atrobe, pasobra nan tin cu gana pa cubri nan costonan, nan gastonan” Dirks a subraya.
