Luis Chong:
*GKMB despues por bay spuit na bo cas pa evita mas caso
ORANJESTAD (AAN): Gele Koorts Muskiet Bestrijding (GKMB) te ainda no a ricibi e mesun cantidad di yamada di molester relaciona cu sangura, compara cu otro añanan.
E piek di molester sinembargo normal ta mas tanto den e lunanan di october, november y december.
Apesar cu Aruba a haya bastante awacero recientemente, te ainda mayor cantidad di yamada ta for di Pariba di brug, specialmente di San Nicolas. Tambe den area di Santa Cruz hendenan a yama tocante molester di sangura.
“E por diferencia cada temporada, pero e lugarnan cu mas problema na Aruba ta e areanan mas habita manera Noord, Oranjestad, San Nicolas y Savaneta”, segun director di GKMB Luis Chong den un entrevista cu DIARIO.
A puntra Chong riba e sintomanan di dengue y el a indica cu e prome ta keintura halto diripiente y esaki ta conta tambe pa Chikungunya y Zika.
Otro sintomanan ta dolor di cabes y dolor tras di wowo, como tambe dolor di curpa y di weso.
Tambe esnan afecta ta sinti un cansancio increibel diripiente.
“Si bo sinti un of mas di e sintomanan aki por fabor bay na bo dokter di cas pa e por haci un test, pa nos haya un indicacion kico ta e situacion na Aruba”.
E dokter despues por meld esaki na DBZ pa asina por evita mas tanto posibel pa e enfermedad plama, segun Chong.
El a splica cu ora cu e resultado yega por yama GKMB libremente y e trahadornan lo check rond di bo cas, pa asina spuit contra sangura si tin mester.
