ORANJESTAD (AAN): Dentro di poco nos ta drenta periodo di vacacion escolar y manera ta conoci, hopi local ta bay di vacacion pa diferente pais y region.
Manera cu Departamento di Salud Publico a bin ta informa comunidad di Aruba pa algun siman caba, e casonan di Measles of tambe yama Sarampi ta sigui aumenta den diferente pais y region rond mundo entre otro:
Canada
Diferente estado di USA
Texas
New Mexico
Kansas
Nort Dakota
Mexico
Europa
Romania,
Francia,
Hulanda,
Italia,
Spania
Asia- Pacifico
Vietnam
Kyrgyzstan
Mongolia
Na tur esnan cu ta planea pa biaha durante e periodo cu ta sigui sea pa vacacion of trabou y ta:
sufri di un malesa of condicion di salud cu ta afecta nan sistema inmunologico.
Y tambe tur esnan cu kisas no ta sigur di ta bon vacuna cu 2 vacuna contra Measles
Ta wordo fuertemente conseha pa “walk in” na seccion di Malesanan Infeccioso situa na Avisenastraat #1, Oranjestad pa vacuna contra Measles minimo 7 dia prome cu biaha.
E vacuna disponibel ta e vacuna MMR (Measles, Mumps, Rubella) un vacuna hopi ‘safe’ cu ta riba mercado desde aña 1971 y ta e mesun vacuna cu ta wordo suministra na Aruba for di aña 1979 na baby y muchanan di scol atraves di Wit Gele Kruis y Seccion Cuido Salud Hubenil.
E vacuna MMR ta un vacuna cu ta wordo produci abase di e metodo tradicional y no ta un vacuna moderno traha abase di e metodo mRNA.
Efectonan secundario comun di e vacuna MMR ta ensera:
Aumento di temperatura corporal of keintura
Rash light (e rash ta disparce y no mester tratamento)
Kliernan por hincha (na garganta of patras di horea)
Dolor na e lugar unda a aplica e inyeccion
Bo salud ta bo responsabilidad, tuma accion pa proteha bo mes contra Measles.
