Segun Ivo Valdes di OPPA:
ORANJESTAD (AAN): “Na Aruba tin hopi pobreza apesar cu hopi biaha nos no ta mir’e of ta sera wowo p’e”. Asina señor Ireno ‘Ivo’ Valdes di Organizacion di Penshonadonan Publico di Aruba (OPPA), a declara na DIARIO.
Siguridad di un pueblo ta ora cu por cumpra cuminda, paga awa y coriente y por biba cu dignidad. Awendia, hende no ta wak pobreza pa motibo cu Arubiano no ta gusta mustra cu cos ta malo. Pero e hecho ta cu tin hopi pobreza na Aruba. El a duna ehempel na e cantidad di hende cu a campa durante e siman di Pasco di Resureccion. Esaki, segun e, por refleha pa hopi hende, cu no tin pobreza na Aruba y cu cos no ta malo na Aruba.
Sinembargo, el a bisa, no solamente esnan cu ta campa ta un minoria, pero, esnan cu ta campa ta esnan cu tin’e bon. Ta esnan cu no a bay campa, ta esnan cu ta pasando den malo of ta sufriendo na cas. Segun e, no por basa na loke ta wak na lama pa conclui cu no tin pobreza. El a agrega cu tin hopi ciudadano cu tin mester di un miho entrada pa sobrevivi cada luna.
Valdes a enfatisa, cu si Aruba tin un gobierno cu vision pa e realidad aki, cada bes pobreza ta bira menos. Un pueblo ta vota pa un gobierno cu ta bringa pobreza enbes di maneha pobreza.
“Hopi di nos grandinan ta muriendo. Y nos no mester laga loke ta pasando eyfo, dicidi pa nos. Y nos no mester laga te ora algo toca nos, pa nos dicidi con pa sigui. Ami a bisa semper, Aruba mester un gobierno cu vision”, señor Valdes a expresa.
Segun Valdes, ta parce cu nos ta warda te na ultimo y ora cu nos no por yuda nos mes, nos ta core colga na saya di Hulanda pa yudansa. “Ta parce cu nos no ta siña di e lesnan cu nos a haya”, el a remarca.
El a enfatisa cu Aruba mester lanta, pensa y actua pasobra nos no por sigui cada bes ta haya sla cu na final ta dal nos hopi duro.
