ORANJESTAD (AAN): Riba Dialuna, Parlamento a sigui cu tratamento di presupuesto di pais Aruba.
Siman pasa ya caba a atende 6 ministerio y asina a sigui cu presupuesto di Ministerio di Asuntonan General, Innovacion, Organizacion Gubernamental, Infrastructura y Planificacion Teritorial y Ministerio di Finansa y Cultura.
E mainta a habri cu un lider di e partido mas grandi di oposicion tur preocupa. E ta asina preocupa cu no obstante cu nos ta tratando e ley di mas importante di nos pais, e tabata tey solamente e prome dia cu nos a cuminsa trata presupuesto y a hiba palabra solamente durante prome tanda y djey a desaparce pa su cueba na Marisol Building. Di dos y di tres dia el a briya cu su ausencia, y riba Dialuna, riba e di cuatro dia el a lanta preocupa y a dicidi pa haci acto di presencia un biaha mas.
Durante 20 minuut el a papia di con bon nos pais tabata tempo e tabata Minister President y a cay den e disco raya di semper di con preocupa e ta.
“Durante cu mi a hiba palabra mi a enfatisa cu lamentablemente e no tabata preocupa ora Banco Central a bise cu e debe y gastonan di nos pais nunca tabata asina halto manera bao su maneho. Lamentablemente tampoco e tabata preocupa ora el a casi redobla e debe nacional di nos pais den apenas 5 aña ora el a crea un MEGADEBE, endeudando ami, mi yiu y nan yiunan. Invertiendo den infrastructura y embeyecimento lubidando pa pone e ser humano central. Asina a crea un crisis social enorme cu lo tuma añanan pa nos trece e solucionnan necesario. Y ora cos a bira cayente y Hulanda a bin pe, el a bay den welga di hamber na lugar di para den su zapato y duna cara y bay mesa di negosacion.”
Segun Tromp-Lee, cu Mike Eman a perde tur clase di laso cu realidad nos a bin ta ripara, mirando cu e no ta papia mes di e pandemia y no kier mira su consecuencia y e impacto devastador cu e tabatin y tin riba nos pais. Sin papia mes di e guera andando na Europa y su impacto.
“Nos por bisa cu mas bien el a bautisa su mes como e mensahero di mal noticia brindando ningun pero ningun clase di solucion y of aporte positivo. Sin papia mes di e meta diario di su partido pa crea panico y desunion den nos pueblo, net awor cu mas cu nunca Aruba mester di cada un di nos pa uni forsa pa pone nos isla back riba pia, den tur sentido di palabra.”
“Pero contrario na Mike Eman, mi persona, no obstante cu mi ta sostene e gobierno aki, ta haci mi trabao responsablemente. Pesey mes mi a dicidi pa no dedica mucho tempo na dje, pasobra Parlamentarionan responsabel, serio y dedica tey pa haci nan trabao,” Tromp-Lee a bisa.
El a finaliza bisando: “Contrario na su persona ami sigur no ta yena mi desertacionnan cu 0 pregunta, sin ningun critica constructivo of sugerencia pa cierto atencion specifico”.
