Frans Ponson di CUA: “mas unfair e no por ta!”
ORANJESTAD (AAN) -- Frans Ponson, den conferencia di prensa di Comerciantenan Uni Aruba (CUA) a cuestiona SETAR NV y e proteccion cu e ta haya di Gobierno, fuertemente, den cuadro di e Ley Aruba Fair Trade Authority.
Frans Ponson a señala cu SETAR awe ta doño di Tele Aruba, e ta doño di Cable, tambe a cumpra un compania di IT masha grandi, cu ta IT Caribbean, e ta invirtiendo den camera y aworaki el a bay den destaho publico di camera y a gana contra e comerciantenan cu ta bendiendo e mesun producto aki. Segun Ponson, cu SETAR ta cumprando tur e companianan local cu mas “unfair” no por ta.
“Awe, e compania aki ta wordo proteha door di gobierno pasobra Digicel no por bin cu su cable y internet Aruba. Si bo kier bin cu cable y internet na Aruba bo no mag, bo no ta haya vergunning”, Ponson a acentua.
Gobierno no ta laga ningun compania bin competi cu SETAR, kiermen e ta gana hopi placa y e placa cu e ta gana ta inverti pa competi den nan seno. “Con un compania chikito Arubiano den e mundo di computer ta bay competi cu un monster asina grandi cu ta wordo proteha door di gobierno?”
Ponson a papia tocante e cuenta anual di aña 2018, cu ta e ultimo cu Gobierno a traha, y a bisa cu Gobierno a coi 7.5 miyon na dividend di SETAR. “Kico esey kiermen? Gobierno ta bay tur panaderia na Aruba stipula prijs, pasobra nan no por gana mucho. Tur pomp station na Aruba no por gana mas di 2 cen pa liter pasobra nan no mag gana hopi. Tur supermercado na Aruba tin canasta basico pasobra nos tin cu proteha e consumidor.
Pero unda e canasta basico di e SETAR ta pa pueblo? No. Pasobra nos mester di e dividendo. E ta unfair cu bo ta proteha un compania na Aruba, cu e so por haci algo, traha miyones, pero eynan, den bo cas bo no ta stipula prijs, y ni un hende na Aruba por bisa mi cu internet ta un luho. E no ta un luho, e ta un necesidad pasobra tur hende tin yiu cu ta bay scol pasobra nan mester di internet pa nan wak nan puntonan. Anto eyden mes gobierno no ta stipula prijs. Na unda Aruba Fair Trade ta pa pueblo, pasobra pueblo no por scoge internet di un otro compania, pasobra SETAR so tin”, Frans Ponson a remarca.
