ORANJESTAD (AAN): Desde aña pasa, SETAR ta ofrece e servicio nobo di Fortinet su Fabric Network y Unified Threat Protection.
E red aki ta consisti di Fortinet Switches, Next Generation Firewall y Access Points.
E sistema aki ta ideal pa scolnan y companianan pasobra ta combina un local area network cu Wi-Fi y ta ofrece un “Unified Threat Protection” (UTP) cu e cinco aplicacionnan mas importante pa protehe bo red.
Aña pasa e servicio aki a worde instala na Instituto Pedagogico Arubano (IPA) y recientemente Setar NV a instala esaki na Colegio Arubano. Awo tur alumnonan di e scolnan aki por ta conecta na Wi-Fi cu speednan halto. Esaki ta hopi importante pa e enseñansa di futuro ya cu ta bay un stap mas leu cu conecta e scol so riba Internet.
E sistema di Fortinet ta uno cu ta hopi “user friendly”. Cu e sistema aki bo por wak reportahenan y tuma accion mas lihe ora cu tin cualkier problema, p.e. bo ta haya un notificacion mesora un access point cay y tambe ki tipo di notificacion e ta.
E sistema aki ta bin cu, entre otro, un “Application Control” unda cu por wak ki aplicacionnan ta worde uza riba e red, tambe e ta ofrece “Intrusion Prevention” cu por detecta ora un persona ta purba hack e red y e asina yama “Fabric Technology” cu ta haci’e posibel pa wak tur device cu ta uza e red. Tur e aspectonan aki ta mehora bo experiencia ora di uza Internet y tambe e “Network Performance”.
Como Setar NV, nan ta orguyoso di por sigui extende servicionan di siguiente generacion na clientenan banda di tur e otro servicionan cu nan ta ofrece.
