Nan lo bende iPhone 14 cu e SIM-Card tradicional
ORANJESTAD (AAN): Gerencia di Setar NV a splica cu recientemente nan a ricibi varios pregunta di su clientenan tocante e asina yama eSIM di iPhone 14, cual Apple a lansa recientemente.
Pa aclarea esaki, Setar NV ta desea di duna un splicacion pa e usuarionan di Apple cu ta interesa den nan modelo di smartphone mas nobo.
Apple a lansa e iPhone 14 den diferente version. Tin version di iPhone 14 cu tin SIM regular, igual na e iPhonenan cu Apple a lansa anteriormente. Esaki Apple lo distribui rond mundo, entre otro pa Aruba.
Pa e mercado local di Merca, nan a lansa un modelo special di iPhone 14 cual ta traha solamente cu e technologia di eSIM. Esaki ta un tecnologia nobo cu no ta adopta ainda rond mundo, y na Aruba tampoco.
Pa e motibo aki iPhone 14 cumpra den tiendanan di Apple na Merca no lo traha por lo pronto na Aruba. Pasobra Aruba no ta ofrece servicio di eSIM.
Segun Setar, nan y otro companianan local lo bende e version di iPhone 14 cu ta haci uzo di SIM-Card regular.
Ainda iPhone 14 no ta wordo bendi na Setar NV. E compania a divulga cu nan lo bay anuncia asina cu ta cuminza cu bendemento di iPhone 14 cerca nan.
