Pa Adulto Mayor y esnan den bijstand lo no tin cambio

ORANJESTAD (AAN): Tene cuenta cu e informacion aki! Serlimar ta informa cu entrante 1 di april 2023, lo tin un adaptacion den su tarifa pa e servicio di recoge y procesa e desperdicio residencial di tur siman. Esaki ta pa cubri e gastonan operacional y di procesamento di desperdicio residencial.

            E lunanan di januari, februari y maart 2023 ta wordo ofreci na e tarifa actual. Ta consehabel pa haci pago online, poniendo e number di cliente y adres.

            Serlimar S.G. ta haciendo esfuersonan pa haya e-mail y number di telefon di tur cliente cu ta recibiendo servicio actualmente. Esaki ta pa por haya e factura mensual via e-mail y asina pueblo y Serlimar S.G. por aporta na medio ambiente, door di menos uso di papel. 

Tarifa nobo

            E adaptacion ta concerni unicamente e tarifa normal, pues pa Adulto Mayor y esnan den bijstand lo no tin cambio. 

Pa esnan cu tin servicio di un (1) container (240 liter), tarifa ta bira Afl. 32,00 pa luna.

Pa esnan cu tin servicio di dos (2) container (480 liter), tarifa ta bira Afl. 41,00 pa luna.

Pa esnan cu tin servicio di tres (3) container (720 liter), tarifa ta Afl. 70,00 pa luna.

            Adultonan Mayor cu ta cobra solamente pensioen di SVb y ta forma un famia te cu 2 persona cu ta dependiente di e pensioen di SVb, ta keda paga e mesun tarifa actual di Afl. 10,00 pa luna. E tarifa aki ta pa e servicio di un (1) container.

            Personanan cu ta cobra onderstand: tarifa di Afl. 0,00 ta keda vigente. Esaki ta ensera un (1) container. 

Factura mensual durante aña 2023

            Pa por ricibi e facturanan mensual digital, por manda un e-mail na: This email address is being protected from spambots. You need JavaScript enabled to view it., cu nomber y fam, adres y number di telefon. Tambe por scan e QR code riba e factura unda cu lo bo por yena bo datonan personal y e-mail adres.

            Ta subraya cu riba cliente su factura di aña 2023, e luna di januari, februari y maart 2023 ta wordo ofreci na e tarifa actual, cual ta Afl. 28,00 pa un container y Afl. 38,00 pa dos container. E late fee di Afl. 5,- no ta aplicabel pa januari, februari y maart. E tarifa nobo ta wordo factura entrante e luna di april 2023. 

Tene cuenta cu lo siguiente:

            Pa pagonan cu drenta despues di dia 14 di luna, cuminsando na april lo cobra Afl. 5.00 extra. Si dia 14 di luna ta cay den weekend, manera luna di mei y oktober, e ultimo dia di pago lo bira 15 di mei  y 16 di oktober, 2023.