Ex Minister Otmar Oduber:
ORANJESTAD (AAN) – Otmar Oduber, pa cera e conferencia di prensa, a referi na e incinerator cu ta trahando awo na Parkietenbos, y cu ta parti di e rapport cu el a menciona den e rueda di prensa aki. E ex-minister a bisa cu Serlimar mester a hinca, mas of menos, 1.5 miyon florin banda di e inversion cu DOW a haci, pa por pone e incinerator traha.
“Nan a consider’e un inversion di locura. Boso sa cuanto DOW lo a bay paga Serlimar pa aña? 800 mil florin! Den dos aña Serlimar lo a saca e placa di e incinerator. Di con? Pasobra DOW, e tempo ey, tabata pagando un compania priva 1.7 miyon florin, pa e mesun trabao cu nan lo a bay paga Serlimar, pa tin e incinerator pa 800 mil florin.
Kiermen, DOW lo a spaar 900 mil florin, casi un miyon florin pa aña, y plus lo a paga Serlinar 800 mil florin, caminda cu tin dos aña di tempo pa haal e inversion ey. Y cu e inversion ey, mescos cu e rapport ta bisa, Serlimar lo a bay genera fondonan adicional, pa duna servicio na tur e clinicanan, na hospital, na tur e medical waste, na tur abogado, notario, banconan caminda documentonan priva por wordo kima, etc., cu lo a genera fondonan pa e compania”, Otmar Oduber a precisa.
Oduber a conclui bisando cu, lamentablemente, Serlimar a bay dies aña atras, danki na e malicia di un mente putri cu tabata tin otro intencionnan cu e compania.
