ORANJESTAD (AAN): Comite Npu di Mabon kier sigui brinda na Bario di Mabon y vecindario, incluyendo pueblo di San Nicolas, cu actividad, programanan y charlanan educativo.
DIARIO a compronde cu awor nan ta bay tin tambe Zumba. Hopi persona ta bin ta gusta Zumba cada bes mas y mas.
Pesey a dicidi di acerca Jadira Leter cu ta un instructor di Zumba licencia pa 8 aña caba pa e por bin duna clas di Zumba na San Nicolas den e Parke di Mabon. Jadira ta bin ta baila for di su edad jong. Baliamento ta su pasion y su don. For di aña 2009 el a cuminsa na haci Zumba, y na aña 2011 Jadira a cuminsa duna clas di Zumba cu awe ta haci 12 aña y ainda ta gusta duna clas di Zumba.
Na aña 2015 Jadira a cuminsa na IBiSA Sporthall, 2018 a duna clas di Zumba na Cuts & Curve pero door di Covid 19 mester a bay pa sigui Zumba den aire liber. A haci Zumba pa un aña den Carnival Village y for di 2022 ta duna clas di Zumba na Centro di Bario Dakota.
Entrante Diaranson 6 di September awor lo trece clas di Zumba back den San Nicolas pa habitantenan di San Nicolas, Mabon, Savaneta, Cura Cabay y Pos Chikito, pa asina tur persona por uni na e clas di Zumba cu lo tuma lugar den e Parke di Mabon. Clas di Zumba ta bay ta tur diaranson. Horario ta 6:30 pm te cu 7:30 pm, y lo tin costo envolvi.
Awe Diasabra dia 2 di September Jadira lo bay tin un charla y lo splica pakico Zumba ta importante pa nos salud cu lo tuma lugar den Centro di Bario Brazil. E charla ta cuminsa 10 am te cu 11 am y lo duna un tiki sabor di e Zumba na esnan presente. Den e luna di September tambe Comite Npu di Mabon tin programanan pa muchanan di 6 aña te cu 12 aña. Dianan lo ta Diamars, Diaranson y Diahuebs. Diamars fecha 5, 12, 19 y 26 ta dia di lesa. lo bay tin bukinan pa muchanan lesa. nos kier stimula e muchanan pa lesa. Diaranson fecha 6, 13, 20 y 27 ta dia di conta storia, storianan biblico. ta importante pa muchanan conose e personahenan den bijbel, conose Dios, conose Cristo Hesus y riba Diahuebs ta dia di educa e muchanan riba e parti social. fechanan ta 7, 14, 21 y 28. Sinjanan cu bully ta malo, descriminacion ta malo.
Como mucha bo ta gusta hunga, y nos como personanan grandi tambe tin derecho tambe pa hunga. Ningun ser humano mester ta prohibi pa hunga, pa diberti, pa pasa pret. Pero tambe nos no por lubida y pone un banda tur loke cu ta importante cu mester ta parti di nos bida. Ta importante pa sa cu scol ta prepara nos pa drenta ley laboral. Pesey mester tuma tempo tambe pa lesa, pa muchanan haci nan tareanan pa haya bon cirfranan pa un rapport bunita y termina bo scol.
Pa por haya bo rapport di scol secundario. Ora cu bo tin un diploma, e ta companja bo pa hiba bo mas lew y por comberti bo den un professional. Nos no kier mira ningun mucha bay den mal caminda. Mal caminda ta hiba bo den perdishon y ta haci bo perde oportunidadnan bon den bida y ta stroba bo ta un bon persona bon den comunidad. Comite Npu ta pidi pa mayornan no laga boso muchanan keda sin bin y forma parti di nos programa pa e muchanan. Dia di lesa buki lo ta den man di Gloria Buddy, dia di conta storia lo ta den man di Mina Kostermans y dia di educacion social lo ta den man di Astrid Vries.
