ORANJESTAD (AAN) – Den un entrevista recien cu DIARIO, señora Monique Giel-Labad di Wit Gele Kruis a
expresa su preocupacion pa e problema di e asina yama "lovers boy", un fenomeno cu, segun e, ainda ta hopi presente entre hobennan, specialmente hobennan cu ta haci e transicion di klas 6 pa scol secundario.
Segun Giel-Labad, e etapa aki ta un periodo vulnerabel den cual algun mucha homber ta acerca muchanan muhe cu palabranan bunita, compliments y atencion constante. Hopi biaha, e muchanan muhe ta interpreta esaki como un señal di amor of interes sincero, sin percata di e intencion real cu por tin tras di e acercamento. Como resultado, algun mucha muhe ta cay den presion of manipulacion emocional cu por conduci nan pa tene relacion sexual.
No obstante, Giel-Labad a enfatisa cu e situacion aki no ta limita solamente na muchanan muhe. El a indica cu tambe tin muchanan homber cu ta haya e mesun tipo di atencion di muchanan muhe. Den ambos caso, peer pressure y deseo di ser acepta of gusta por hunga un papel importante, cu por resulta den decisionnan cu despues tin consecuencianan serio.
Señora Giel-Labad a splica cu, pa hopi aña, Wit Gele Kruis ta atende casonan di muchanan muhe cu a drenta den relacionnan sexual pa motibo cu nan no kier perde e persona cu nan ta gusta. Como consecuencia, hopi di nan ta keda na estado na un edad den cual ainda nan no ta emocional ni financieramente prepara pa cria un yiu. Segun e, den mayoria di e casonan, e plan aki no ta funciona y e mucha muhe ta termina ta carga cu e responsabilidad principal su so.
El a agrega cu den caso di muchanan homber, durante consultanan y charlanan, semper e ta enfatisa cu si nan contribui na un embaraso, nan mester asumi nan responsabilidad. Combina e responsabilidad di paternidad cu estudio ta bira un reto grandi pa hopi hoben, loke por crea tension, conflicto, maltrato verbal of fisico, y finalmente causa cu hopi relacion ta kibra.
Como mensahe final, señora Giel-Labad ta haci un yamada na mayornan pa mantene un comunicacion habri cu nan yiunan, specialmente durante e transicion di enseñansa primario pa secundario. E ta conseha pa observa cualkier cambio den comportamento, ta presente den nan bida y crea un ambiente di confiansa unda hobennan por sinti nan mes sigur pa papia tocante relacionnan, presion social y sexualidad.
